«Álem» baleti Ońtústik Koreıa kórermenderin tánti etti
Bul týraly QR SІS baspasóz qyzmetinen habarlady.
"Astana Ballet" ártisteri Seýldiń eń iri kontserttik alańdarynyń biri - "Yeouido KBS Hall" sahnasynda Bolat Ǵafarov pen Armand Amardyń mýzykasyna jazylǵan áıgili reseılik horeograf Nıkıta Dmıtrıevskııdiń qoıylymymen bir aktilik "Álem" baletin halyqaralyq deńgeıde pash etti.
"Astana Ballet" ónerin kórýge jınalǵan káris kórermenderi sahna sańlaqtarynyń naǵyz sheberligin óte joǵary baǵalady. Klassıkalyq, qazirgi zamanǵy jáne ulttyq bılerdiń tańqalarlyq úılesimi bolyp tabylǵan "Álemniń" dekoratsııasy retinde óte kúrdeli partıtýra, arnaıy áserler, kompıýterlik grafıka jáne qazaq dalasynda arnaıy túsirilgen beıneler qoldanylǵan.
Ádemi áserdiń jeteginde qalǵan kórermender qoıylym sońynda oryndarynan turyp, uzaq ýaqyt boıy qol soǵyp, shynaıy qoshemetterin bildirdi.
Koreıanyń óner qaıratkerleri jáne sarapshylary qoıylymnyń tehnologııalyq súıemeldeýin joǵary baǵalap, mundaıdy tipti Ońtústik Koreıada buryn-sońdy kezdestirmegenderin atap ótýde.
Horeografııalyq ónerdiń jarqyn beınelerine baǵyttalǵan "Astana Ballet" shyǵarmashylyq ujymy Qazaqstannyń ulttyq bı óneriniń álemdik mádenı úderisine qosylýyn kózdeýde.
"Álem" baleti - adam janynyń tarıhy, onyń adam denesinde qalaı oryn alatynyn jáne adamnyń dúnıege keler aldynda qandaı aýyr synaqtardan ótetinin sýretteıdi. Bul fılosofııalyq balettiń negizi - ejelgi qazaq eposy, adamzattyń paıda bolýy týraly ańyz bolyp tabylady.
Qoıylym arnaıy "Astana Ballet" úshin shyǵarylǵan. Bul Qazaqstannan shyqqan jas ujymnyń eń úlken derbes jumysy jáne alǵashqy álemdik sapary bolyp tabylady. Buǵan deıin "Álem" baleti Vena, Parıj jáne Máskeýde tamashalandy.