Álem ádebıeti qazaq tiline aýdarylatyny qýantady - professor Ámir Musaqulov

ShYMKENT. QazAqparat  -  Elbasy «Bolashaqqa baǵdar: rýhanı jańǵyrý» atty baǵdarlamalyq maqalasynda álemdegi eń úzdik 100 oqýlyqtyń qazaq tiline aýdarylatynyn aıtyp, jastardyń dúnıejúzindegi tańdaýly oqýlyqtar negizinde bilim alýyna múmkindik jasaý kerektigin mindettegen bolatyn. Bul  bastamaǵa  qatysty ońtústiktiń fılolog ǵalymy, professor  Ámir Musaqulov óz pikirin bildirdi, dep habarlaıdy  QazAqparat tilshisi.

Ardager ustazdyń sózinshe, bul bastama qazaq tiliniń ózin de alǵa jeteleıdi. Jastardyń oı-órisin keńeıtip, olardyń oqýlyqtaryna kóp mán beriledi.

«Jasyratyny joq, keshegi keńes zamanynda gýmanıtarlyq ǵylymdar saıasatqa qyzmet etip, ıdeologııanyń ǵana quraly boldy. Zııaly ortanyń kózqarastary men qundylyqtaryna yqpaly zor osy bilim salalary bizde áli de eski sarynnan aryla almaı otyr. Joǵary oqý oryndarynda stýdentterdiń 70 paıyzy qazaq tilinde bilim alady dep qýanǵanymyzben, olardyń ne oqyp júrgenine endi ǵana mán bere bastadyq. Ardager ustaz retinde qazaq tilindegi álemniń úzdik oqýlyqtary gýmanıtarlyq bilimmen qatar, qazaq tiliniń ózin de alǵa aparatyn ǵajap bastama dep oılaımyn. Pedagogtar men stýdentter de solaı qabyldaıdy degen senimdemin»,- deıdi professor Ámir Musaqulov.