Alekseı Poltoranın «altynǵa» úmitker bolǵan - Serik Sápıev

ASTANA. QazAqparat - Avstrııadaǵy álem chempıonatynda ustalǵan qazaqstandyq shańǵyshy Alekseı Poltoranın «altyn» júldege úmitker bolǵan. Bul týraly QR Mádenıet jáne sport mınıstrligi Sport jáne dene shynyqtyrý komıtetiniń tóraǵasy Serik Sápıev málimdedi, dep habarlaıdy QazAqparat tilshisi.

Komıtet basshysy dopıng qoldandy degen kúdikpen ustalǵan qazaqstandyq sportshynyń qazir tergeý oqshaýlaǵyshynda otyrǵanyn jetkizdi.

«Memlekettik organ basshysy retinde mundaı jaǵdaılardy azaıtý úshin ózimizdiń Ulttyq olımpıadalyq komıtet atynan talap aryz jazý kerek shyǵar. Jarys aldynda sportshyny mazalamaı, jáı ǵana synama alyp ketkenderi durys. Múmkin, aıaqtan shalǵysy kelgender de bar shyǵar. Sebebi, ol (Alekseı Poltoranın - red.) óz qashyqtyǵynda altyn júldege úmitker bolǵan. Ony jarystan shyǵaryp tastaǵysy kelgen shyǵar», - dedi Serik Sápıev Astanada ótken brıfıngte.

Eske sala ketsek, keshe Aýstrııanyń Zeefelde qalasynda ótip jatqan álem chempıonatynda Alekseı Poltoranın jarys jolyna shyqpaı qaldy. Nemis jýrnalısi Haıo Zeppelt Týıtterdegi akkaýntynda «shańǵy jarysynan ótip jatqan álem chempıonatynda Qazaqstan, Aýstrııa jáne Estonııa sportshylary antıdopıngtik erejelerdi buzdy dep kúdikke ilingenin» jazdy. Atalmysh oqıǵaǵa qatysty Astanada baspasóz máslıhatyn ótkizgen sport jáne dene shynyqtyrý komıtetiniń tóraǵasy Serik Sápıev «Men Alekseıdiń taza sportshy ekenine senimdimin» degen bolatyn.