Alekseı Tsoı Ulybrıtanııanyń Qazaqstandaǵy elshisimen vaktsınatsııa sertıfıkattaryn ózara taný máselesin talqylady

NUR-SULTAN. QazAqparat - QR Densaýlyq saqtaý mınıstri Alekseı Tsoı Ulybrıtanııanyń Qazaqstan Respýblıkasyndaǵy Tótenshe jáne Ókiletti Elshisi Ketı Lıchpen kezdesý ótkizdi. Taraptar densaýlyq saqtaý salasyndaǵy ekijaqty yntymaqtastyqtyń perspektıvalaryn talqylady, dep habarlaıdy QazAqparat QR Densaýlyq Saqtaý mınıstrliginiń baspasóz qyzmetine silteme jasap.

Kezdesý basynda A.Tsoı Ketı Lıch hanymdy Ulybrıtanııanyń Qazaqstan Respýblıkasyndaǵy Tótenshe jáne Ókiletti Elshisi laýazymyna taǵaıyndalýymen quttyqtady. Sondaı-aq mınıstr Qazaqstan-Brıtan úkimetaralyq komıssııasynyń jyl saıynǵy otyrysyn ótkizý yntymaqtastyqtyń mańyzdy máseleleriniń keń aýqymyn qamtýǵa múmkindik beretinin atap ótti.

A. Tsoı Densaýlyq saqtaý salasyndaǵy ekijaqty yntymaqtastyqty damytýdyń mańyzdylyǵyna nazar aýdaryp, Ketı Lıch hanymdy ekonomıkalyq turaqtylyqty qamtamasyz etý jáne ınfektsııanyń taralýyna qarsy is-qımyl jasaý, sondaı-aq COVID-19 taralýynyń aldyn alý jáne densaýlyq saqtaý júıesiniń syrqattanýshylyqty kóterýge daıyndyǵyn qamtamasyz etý boıynsha qabyldanǵan sharalar týraly habardar etti. Osylaısha, COVID-19 taralýyn baqylaý, sondaı-aq juqtyrý oshaqtaryn ýaqtyly oqshaýlaý maqsatynda QR-da «Ashyq» mobıldi qosymshasy ázirlendi, ol azamattyń epıdemıologııalyq mártebesin aıqyndaýǵa múmkindik beredi, elektrondyq vaktsınatsııa pasporty ázirlendi jáne engizildi, ol Egov mobile mobıldi qosymshasymen ıntegratsııalanǵan.
«Qazaqstandyq elektrondyq vaktsınatsııa tólqujatyn 6 el moıyndady: Vengrııa, Taıland, Mońǵolııa, Grýzııa, Qyrǵyz Respýblıkasy jáne Moldova Respýblıkasy. Búgingi tańda basqa eldermen vaktsınatsııalaý pasporttaryn ózara taný máselesi pysyqtalýda.

Osyǵan baılanysty, Qazaqstan men Ulybrıtanııanyń vaktsınatsııalanǵan azamattarynyń transshekaralyq oryn aýystyrýy úshin shekteýlerdi joıý jónindegi máseleniń mańyzdylyǵy men ózektiligin atap ótip, vaktsınatsııa sertıfıkattaryn ózara taný máselesin qarastyrýdy usynamyz», - dedi A.Tsoı.

COVID-19 taralýyna baılanysty saqtalyp otyrǵan turaqsyz jaǵdaıdy eskere otyryp, Mınıstr aǵymdaǵy epıdemıologııalyq jaǵdaı, sondaı-aq ony turaqtandyrý boıynsha júrgizilip jatqan sharalar boıynsha turaqty aqparat almasý túrinde áriptestikti jandandyrýdy usyndy.

Kezdesý sońynda A. Tsoı Ulybrıtanııanyń MSAK jónindegi Astana deklaratsııasyn ilgeriletý jónindegi Dostyq elder tobyna qosylýyna jáne bastapqy býyn deńgeıinde medıtsınalyq kómek kórsetý sapasyn jaqsartýǵa baǵyttalǵan birlesken is-sharalardy iske asyrýǵa qatysýyna múddeliligin bildirdi. Sondaı-aq, qol jetkizilgen ýaǵdalastyqtardy júzege asyrý boıynsha yntymaqtastyqty jalǵastyrýǵa daıyndyǵyn bildirdi.