Alekseı Tsoı: Mamyrdyń sońynda qosymsha «QazVac» pen «Haıat Vak» vaktsınalary jetkiziledi

NUR-SULTAN. QazAqparat – Mamyrdyń sońyna deıin «QazVac» pen «Haıat Vak» vaktsınalary jetkiziledi. Bul týraly búgin Úkimet otyrysynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«Koronavırýsqa qarsy vaktsınalaý jalǵasyp jatyr. Búginde vaktsınanyń 2,6 mln dozasy qoldanyldy. Onyń ishinde birinshi komponentpen 1 871 823 adam ekpe aldy. Ekinshi komponentpen 778 346 adam qamtyldy», - dedi mınıstr.

Sonymen qatar ol Bas memlekettik sanıtar dárigerdiń Spýtnık V vaktsınasynyń birinshi komponentinen keıin ekinshisin alý aralyǵyn 21-den 90 kúnge deıin uzartýǵa qatysty qaýlysyna ózgertý engizilgendigin atap ótti. ıAǵnı, azamattar ekinshi komponentti birinshisin alǵannan keıingi 21 kúnnnen bastap saldyra alady.

«Búginde ekpe pýnktterinde vaktsınanyń jetkilikti dozasy bar: shamamen 500 myń birinshi komponent jáne 750 myń ekinshi komponent. Vaktsınany jetkizý de kestege sáıkes júrgizilip jatyr. Atap aıtqanda, 14 mamyrda Qaraǵandy farmatsevtıkalyq zaýytyna Spýtnıka V óndirýge arnalǵan sýbstantsııa jetkizildi. Qazirgi ýaqytta vaktsınanyń 1,2 mln dozasyn kezeń-kezeńimen óndirý júrgizilip jatyr. Sonymen qatar aıdyń sońyna deıin qosymsha KazVac jáne Haıat Vak vaktsınalarynyń jetkiziletindigi kútiledi», - dedi Alekseı Tsoı.