Alekseı Tsoı koronavırýstyń jańa shtamy anyqtalǵan óńirlerdi atady

NUR-SULTAN. QazAqparat – Ulttyq qoǵamdyq densaýlyq saqtaý ortalyǵy fılıalynyń referens-zerthanasy júrgizgen zertteýlerdiń qorytyndysy boıynsha Qazaqstan Respýblıkasynda «brıtandyq», «ońtústik afrıkalyq», «brazılııalyq» shtamǵa tán yqtımal mýtatsııa anyqtaldy. Bul týraly Densaýlyq saqtaý mınıstri Alekseı Tsoı málim etti, dep habarlaıdy QazAqparat tilshisi.

Qazaqstanda Dúnıejúzilik densaýlyq saqtaý uıymymen birlesip Covid-19 shtamdaryn anyqtaıtyn ekspress PTR-skrınıngtiń jańa ádisi engizildi. Ulttyq qoǵamdyq densaýlyq saqtaý ortalyǵy fılıalynyń referens-zerthanasy KVI anyqtalǵan naýqastardan alynǵan zerthanalyq úlgilerdi zerdeledi.

«Zertteý qorytyndysy boıynsha Shyǵys Qazaqstan, Qostanaı, Pavlodar jáne Soltústik Qazaqstan oblysynan ózge óńirlerde «brıtandyq», «ońtústik afrıkalyq», «brazılııalyq» shtamǵa tán yqtımal mýtatsııa anyqtaldy. Almaty qalasynda naýqastardan alynǵan DNK-nyń sekvenırleý nátıjesi boıynsha «brıtandyq» jáne «ońtústik afrıkalyq» shtamynyń aınalymy belgilengen», - dedi A.Tsoı.

Onyń aıtýynsha, Dúnıejúzilik densaýlyq saqtaý uıymynyń 2021 jylǵy 30 naýryzdaǵy derekteri boıynsha «brıtandyq shtamm» 125 elde, «ońtústik afrıkalyq» - 75 elde, al «brazılııalyq» 41 elde anyqtaldy. Koronavırýstyń jańa shtamdary men alǵashqy shtamnyń belgileri birdeı – dene temperatýrasy kóteriledi, jótel jáne adam dám men ıis sezbeı qalady.

DDU málimetteri boıynsha vırýstyń yqtımal mýtatsııasy adamdardyń indetti juqtyrý jıiligine qaraı artady.

«Jańa vırýs kóp taraǵan elderdiń tájirıbesine qarasaq, áleýmettik ara qashyqtyq saqtaý nátıjesinde jáne densaýlyq saqtaý uıymdarynda ınfektsııanyń aldyn-alý jáne baqylaý sharalaryn qoldaný arqyly COVID-19 aýrýy tómendegen», - dedi mınıstr.