Alekseı Tsoı qoldan jasalǵan ókpeni jeldetý apparatyn paıdalanbaýǵa shaqyrdy
«Áleýmettik jelilerdegi azamattardyń óz qoldarymen jasap alýǵa tyrysyp jatqan ár qıly tásilderin kórip otyrmyz. Olar túrli quraldar arqyly tynys alý qyzmetterin jaqsartýǵa tyrysady. Qoldan jasalǵan qurylǵyny ınternetten kórip alyp, úılerinde ózinshe em alý úshin jasap alady. Bul rette, barynsha saqtyq tanytý qajet», - dedi mınıstr búgin Ortalyq kommýnıkatsııalar qyzmetindegi brıfıngide tilshilerdiń saýalyna oraı.
Mınıstrdiń túsindirýinshe, apparatqa quıylatyn suıyqtyq taza bolmaı qalsa, onda bul jaıt ókpeniń túrli bakterııalarmen zaqymdanýyna alyp keledi.
«Qoldan jasalǵan mundaı qurylǵylarǵa barynsha saqtyqpen qaraǵan jón. Aýrýdyń asqynýyna alyp kelýi múmkin táýekel barlyq ýaqytta bolady. Ókinishke oraı mundaı faktiler tek bizde ǵana oryn alyp otyrǵan joq. Sondyqtan azamattarymyzdy saqtandyrýymyz qajet», - dedi Alekseı Tsoı.