Alekseı Tsoı karantın sharalary týraly: Shekaradaǵy baqylaýdy álsiretken joqpyz

NUR-SULTAN. QazAqparat – Qazaqstan shekaralas kórshi elderdegi epıdemıologııalyq ahýalǵa jiti monıtorıng jasap otyr. Bul jaıynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«Shyndyǵynda shekaralas kórshi elderdegi ahýalǵa monıtorıng jasap otyrmyz. Ózderińiz de biletindeı, memlekettik shekaradaǵy baqylaýdy álsiretken joqpyz. Bizde 30 kúnde bir ret ótý múmkindigine, mindetti túrde PTR-testileýdiń teris nátıjesi bolýyna qatysty talap boldy. Bul talaptar ushaqpen qatynaıtyndarǵa da saqtalady. Mundaı talapty elimizdiń azamattary da, sheteldikter de shekaralyq ótkelderden ótkende nemese áýejaıda mindetti túrde oryndaıdy», - dedi mınıstr Úkimet otyrysynan keıin BAQ ókilderiniń saýalyna oraı.

Osy rette Alekseı Tsoı «Covid-siz saıahatta» dep atalatyn mobıldi qosymsha bar ekendigin, ol Eýrazııalyq ekonomıkalyq odaq elderinde qoldanylatyndyǵyn atap ótti. Atalǵan qosymshada PTR testileý nátıjelerine qatysty aqparat almasylatyndyǵyna nazar aýdardy.

«Biz talapty ózgertken joqpyz. Tek Qazaqstan ishinde ǵana birqatar is-sharany jeńildettik. Eńbastysy Ashyq júıesi elementin paıdalanymyz jáne bıznestiń jumys ýaqytyn atalǵan baǵdarlama aıasynda ǵana keńeıtemiz. Sondyqtan ahýal monıtorıngilenip otyrady. Jalpy, eger de kóshi-qon aǵynyń artqanyn baıqaıtyn bolsaq, onda qosymsha is-sharalar qoldanamyz», - dedi ol.