Alekseı Tsoı epıdemıologııalyq ahýaly laıyqty qadaǵalanbaı jatqan úsh óńirdi atady

NUR-SULTAN. QazAqparat – Densaýlyq saqtaý mınıstri Alekseı Tsoı epıdemıologııalyq ahýaly jetkilikti deńgeıde qadaǵalanbaı jatqan úsh óńirdi atady. Onyń aıtýynsha respýblıkada koronavırýs juqtyrǵan azamattardyń 40 paıyzy – osy úsh oblystyń turǵyndary, dep habarlaıdy QazAqparat tilshisi.

«26 qańtardaǵy epıdemıologııalyq ahýaldy baǵalaý matrıtsasyna sáıkes, Qazaqstannyń 6 oblysy men 2 qalasy «qyzyl» aımaqta tur. Olar: Aqmola, Pavlodar, Atyraý, Qostanaı, Soltústik Qazaqstan, Batys Qazaqstan oblystary men Nur-Sultan jáne Almaty qalalary. Bul rette Aqmola, Pavlodar, Qostanaı oblystarynda epıdemıologııalyq ahýaldy jetkilikti deńgeıde baqylaý júrgizilip jatpaǵanyn atap ótý kerek. Osynyń saldarynan respýblıkada koronavırýs juqtyrǵan azamattardyń 40 paıyzy – osy oblystardyń turǵyndary. Osyǵan baılanysty atalǵan óńirlerdiń ákimderi tıisti ári tıimdi shekteý sharalaryn engizip, onyń saqtalýyna basa mán berýi kerek», - dedi Alekseı Tsoı Úkimettiń keńeıtilgen otyrysynda.

Eske sala ketsek Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr. Onlaın formattaǵy jıynda eldiń áleýmettik-ekonomıkalyq damýynyń 2020 jylǵy qorytyndylary men aldaǵy jospary talqylanýda.