Aleksandr Sıdorovıch: Eýrazııalyq yntymaqtastyq - Nursultan Nazarbaev úshin ómirlik ıdeıa

NUR-SULTAN. QazAqparat - Eýrazııalyq yntymaqtastyq - Nursultan Nazarbaev úshin ómirlik ıdeıa. Bul týraly «Eýrazııalyq ıntegratsııa - N.Nazarbaevtyń tarıhı bastamasy» taqyrybyndaǵy onlaın rejımde ótken telekópir barysynda M.Lomonosov atyndaǵy MMÝ Qazaqstan fılıalynyń dırektory, ekonomıka ǵylymdarynyń doktory Aleksandr Sıdorovıch aıtty, dep habarlaıdy QazAqparat tilshisi.

«Nursultan Ábishuly úshin Eýrazııalyq ıntegratsııa ıdeıasy - bul onyń ómirlik ishki ıdeıasy. Elbasynyń Eýrazııa ýnıversıtetinde Eýrazııa ýnıversıtetteri qaýymdastyǵynyń sezinde sóılegen sózine kýá bolǵanymyz bar. Dál sol oqıǵa barysynda Nursultan Ábishuly 10 mınýt boıy zalda tikesinen tik turyp, eýrazııalyq birlikke qatysty eń qazynaly oılarymen bólisken edi. Zalda dostastyqtyń barlyq elderinen 100 rektor otyrdy», - dep eske alady Aleksandr Sıdorovıch.

Onyń atap ótýinshe, sol jolǵy kezdesý belgilengen ýaqyttan da uzaqqa sozylyp ketken.

«Suraqtar talqylanǵan sátte bul kezdesý 30 mınýttyń ishinde aıaqtalady dep boljanǵan edi. Alaıda Nursultan Ábishuly taǵy da jarty saǵat sóılep, bul yntymaqtastyqtyń damıtyndyǵyna nyq senimdi ekendigin jan-jaqty túsindirip berdi. QR Tuńǵysh Prezıdenti eýrazııalyq yntymaqtastyq ıdeıasyna jan-tánimen berilgen jáne ol tosynnan emes. Bul ıdeıanyń artynda aýqymy úlken protsester, aýqymdy oılar men jańa dúnıetanym jatyr»,- dedi ol.

Eýrazııa ulttyq ýnıversıteti men M.Lomonosov atyndaǵy MMÝ-diń Qazaqstandaǵy fılıaly birlesip uıymdastyrǵan telekópir barysynda eýrazııalyq ıntegratsııanyń tujyrymdamalyq máseleleri, odaq memleketteriniń bilimi men ekonomıkalyq ósimi arasyndaǵy ózara baılanys, ǵylym men zamanaýı ınnovatsııalyq tehnologııalardy damytý, eýrazııalyq ekonomıka jáne mádenı yntymaqtastyq vektorlary talqylandy.