Aleksandr Nedovesov Shvetsııadaǵy jarystyń jartylaı fınalyna shyqty

ASTANA. QazAqparat - Qazaqstannyń juptyq syndaǵy birinshi, álemniń 53-raketkasy Aleksandr Nedovesov Bastad (Shvetsııa) ATP 250 týrnıriniń jartylaı fınalyna shyqty, dep habarlaıdy QazAqparat tilshisi.

Qazaqstandyq tennısshi ekvadorlyq Gonsalo Eskobarmen birge shırek fınalda serbııalyqtar Nıkola Kachıch - Dýshan Laıovıchpen sheberlik baıqasty.

Birinshi partııada qazaqstandyq-ekvadorlyq jup qos breıkke qol jetkizdi - 6:1.

Tartystylaý órbigen ekinshi setti jeńispen támamdady - 7:5.

Bir saǵattan astam ýaqytqa sozylǵan matchta G. Eskobar men A. Nedovesov 3 eıspen birge 11 breık-poınttyń tórteýin paıdalana bildi.

Aleksandr Nedovesov pen Gonsalo Eskobardyń jartylaı fınaldaǵy qarsylastary keıin anyqtalady.

Eske sala keteıik, budan buryn Elena Rybakınanyń eısten álemde kósh bastaǵanyn jazǵan bolatynbyz.