Aleksandr Nedovesov Nıderlandtaǵy jarysta «Úlken dýlyǵa» chempıondaryn utty

ASTANA. QazAqparat - Qazaqstannyń juptyq syndaǵy birinshi raketkasy Aleksandr Nedovesov Hertogenbos (Nıderland) ATP 250 týrnıriniń shırek fınalyna shyqty, dep habarlaıdy QazAqparat tilshisi.

Qazaqstandyq tennısshi ekvadorlyq Gonsalo Eskobarmen birge osy dodanyń ekinshi raketkalary, salvadorlyq Marselo Arevalo - nıderlandylyq Jan-Jıýlen Roıermen sheberlik baıqasty.

Qazaqstandyq-ekvadorlyq jup kútpegen jerden qarsylastaryn 6:4, 3:6, 10:6 esebimen tize búktirdi.

Saǵat jarymǵa jýyq ýaqytqa sozylǵan matchta A.Nedovesov pen G.Eskobar 3 eıs jasap, 7 breık-poınttyń bireýin paıdalana bildi.

Marselo men Jıýlen - 2022 jylǵy Frantsııa ashyq chempıonatynyń jeńimpazdary. Oǵan qosa nıderlandylyq sportshy juptyq synda 2017 jylǵy AQSh ashyq chempıonatynda jáne 2015 jylǵy Ýımbldonda chempıon atanǵan edi.

Aleksandr Nedovesov pen Gonsalo Eskobar jartylaı fınalǵa shyǵý úshin jergilikti dýet Robın Hase - Tallon Grıkspýrmen talasady.

Eske sala keteıik, budan buryn Aleksandr Býblıktiń Nıderlandtaǵy jarystyń ekinshi aınalymyna shyqqanyn jazǵan bolatynbyz.

Sondaı-aq tennısten Ýımbldon týrnıriniń júlde qory rekordtyq kólemge jetti.