Aleksandr Nedovesov Meksıkadaǵy týrnırdiń shırek fınalyna joldama aldy

<p>ASTANA. KAZINFORM &ndash; Qazaqstannyń juptyq syndaǵy birinshi raketkasy Aleksandr Nedovesov Los-Kabos (Meksıka) ATP 250 týrnıriniń shırek fınalyna joldama aldy.</p>

Qazaqstandyq tennısshi ekvadorlyq Gonsalo Eskobarmen birge bastapqy kezdesýin taǵy bir ekvadorlyq Dıego Idalgo – kolýmbııalyq Krıstıan Rodrıgespen ótkizdi.

A.Nedovesov – G.Eskobar 6:2, 6:4 esebimen basym tústi. Saǵat jarymǵa jýyq ýaqytqa sozylǵan báseke barysynda olar 8 eıspen birge 12 breık-poınttyń tórteýin paıdalandy. D.Idalgo – K.Rodrıges 1 eıs, 1 breıkten (3 breık-poınt) asa almady.

Qazaqstandyq-ekvadorlyq juptyń shırek fınaldaǵy qarsylastary keıin anyqtalady.

A.Nedovesov ATP Live reıtıngisinde qazirgi kezde 49-orynda tur.

Eske sala keteıik, budan buryn Elena Rybakınanyń eki aıda bes ret WTA týrnıriniń shırek fınalyna shyqqanyn jazǵan edik.