Aleksandr Lýkashenko men Baqytjan Saǵyntaev TMD aıasyndaǵy yntymaqtastyqty nyǵaıtý jóninde pikir almasty

ASTANA. QazAqparat - TMD úkimetteriniń basshylary keńesiniń otyrysy aıasynda Belarýs Respýblıkasynyń Prezıdenti Aleksandr Lýkashenko TMD premer-mınıstrlerin qabyldady, dep habarlaıdy primeminister.kz.

Kezdesý barysynda Aleksandr Lýkashenko men Baqytjan Saǵyntaev halyqaralyq áleýmettik-ekonomıkalyq kún tártibindegi jáne Táýelsiz Memleketter Dostastyǵy aıasyndaǵy yntymaqtastyqty nyǵaıtýdaǵy ózekti máseleler jóninde pikir almasty.

Aıta ketý kerek, bıylǵy jyldyń 16 qyrkúıeginde, Bishkektegi TMD sammıtinde memleketterdiń basshylary Qazaqstan Prezıdenti Nursultan Nazarbaev bastamashylyq etken Dostastyqty zamanaýı shyndyqtarǵa beıimdeý jóninde sheshimder qabyldady.

Osy oraıda, B. Saǵyntaev Qazaqstannyń ortaq jobalardy iske asyrýǵa asa úlken mán beretinin jáne alda bolatyn TMD úkimetteriniń basshylary keńesiniń otyrysy jemisti ótetindigine senimdi ekenin, al qabyldanǵan qujattardy júzege asyrý Dostastyq sheńberindegi ekijaqty ózara is-qımyldy damytýdyń qosymsha serpini bolatynyn atap ótti.

Sózin qorytyndylaı kele, B. Saǵyntaev ortaq jobalardy iske asyrýǵa Qazaqstannyń daıyn ekendigin jáne TMD boıynsha seriktes memlekettermen ári qaraı belsendi túrde yntymaqtastyǵyn jalǵastyratynyn málimdedi.

Eske sala keteıik, QR Premer-Mınıstri Baqytjan Saǵyntaev jumys saparmen Mınsk qalasynda júr. Keshe ol munda Eýrazııalyq úkimetaralyq keńes otyrysyna qatysqan bolatyn.