Aleksandr Gıntsbýrg: Vaktsına alǵandarda postkovıd sındromynyń áseri mınımaldy bolady

MÁSKEÝ. TASS-QazAqparat – Jańa koronavırýs ınfektsııasyna qarsy vaktsınalanǵan, biraq COVID -19-ben aýyrǵan azamattarda postkovıd sındromynyń áseri mınımaldy túrde bolady. Mundaı málimdemeni Reseıdiń N. F. Gamaleıa atyndaǵy ortalyq dırektory Aleksandr Gıntsbýrg jasady, dep habarlaıdy QazAqparat TASS agenttigine silteme jasap.

«Vaktsınatsııa jaǵdaıynda aýrýdyń búkil protsesi jutqynshaq arqyly júredi, al qozdyrǵysh ókpege túskende nemese búkil denege taralǵan kezde postkovıdtik sındrom paıda bolady», - dedi Gıntsbýrg.

Gıntsbýrg buǵan deıin «Spýtnık V» vaktsınasynyń eki komponentimen vaktsınalanǵandardyń arasynda koronavırýs ınfektsııasy jaǵdaılary sırek kezdesetinin habarlaǵan. Negizinen, olar ekinshi vaktsınatsııadan keıin úsh apta ishinde, ımmýnıtet áli tolyq damymaǵan kezde bekitiledi.

N.I.Pırogov atyndaǵy Reseı ulttyq zertteý medıtsınalyq ýnıversıtetiniń aýrýhanalyq terapııa kafedrasynyń meńgerýshisi, Reseı respıratorlyq qoǵamynyń basqarma tóraǵasy, Reseı Ǵylym akademııasynyń akademıgi Aleksandr Chýchalınniń aıtýynsha, COVID-19-dan keıin kóptegen adamda postkovıdten keıingi mıokardıt, ókpede, uıqy bezinde, baýyrda úlken ózgerister jáne basqa da birqatar problemalar anyqtalǵan.

Eske salsaq, buǵan deıin Reseıdegi N.F.Gamaleıa atyndaǵy ulttyq epıdemıologııa jáne mıkrobıologııany zertteý ortalyǵynyń dırektory Aleksandr Gıntsbýrg «Spýtnık V» vaktsınasy uzaq ýaqyt boıy osy indetti juqtyrý qaýpin joıatyndyǵy týraly aıtty.