Aleksandr Gerlıts: Búgingi jeńisimdi qazaqstandyq arýlarǵa arnaımyn

NUR-SULTAN. QazAqparat - 2022 jylǵy XIII qysqy Paralımpıada oıyndarynda para bıatlonnan túregep syrǵanaýda qola júlde alǵan Aleksandr Gerlıts osy jetistigin qazaqstandyq názik jandardyń qurmetine arnady, dep habarlaıdy QazAqparat tilshisi.

Aıta ketsek, qazaqstandyq sportshy parabıatlonnan 10 shaqyrymǵa túregep syrǵanaýda máre syzyǵyn úshinshi bolyp qıdy. Elimizdiń atynan atalǵan saıysta baq synaǵan jalǵyz sportshy osylaısha bıylǵy básekede júldege qol jetkizgen alǵashqy sportshy atandy.

Jarystan keıin jýrnalısterge burǵan suhbatynda bul jeńisin qazaqstandyq názik jandardyń meıramyna arnaıtynyn aıtty.

«Barsha qazaqstandyq áıel azamattardy búgingi merekesimen quttyqtaımyn. Jeńisimdi sol aıaýly jandardyń qurmetine arnaımyn», - dedi Aleksandr Gerlıts.

Sondaı-aq, búgin para bıatlonnan otyryp syrǵanaýda Sergeı Ýsoltsev 14, Erbol Hamıtov 16-oryn aldy.

Eske salsaq, XIII qysqy Paralımpıada oıyndarynda Qazaqstan atynan Sergeı Ýsoltsev, Aleksandr Gerlıts, Erbol Hamıtov, Denıs Petrenko men ıÝrıı Berezın el namysyn qorǵaıdy.

Endi qazaqstandyq sportshylar 11, 12, 13 naýryz kúnderi aıtýly alamanda baq synaıdy.

Qysqy Paralımpıada 4 jáne 13 naýryz aralyǵynda ótkiziledi. Onda álemniń 50 memleketinen kelgen 700-ge tarta sportshy baq synaýda. Qazaqstan atynan barǵan 5 parasportshy sporttyń eki túrinen jarysqa qatysýda.