ASTANA. KAZINFORM – Qazaqstannyń birinshi, álemniń 10-raketkasy Aleksandr Býblık Rotterdam (Nıderland) ATP 500 týrnıriniń fınalyna shyǵa almady.
Qazaqstandyq tennısshi jartylaı fınalda álemniń 6-raketkasy, kanadalyq Felıks Oje-Alıassımge tap keldi.
Kanadalyq sportshy 6:1, 6:2 esebimen jeńiske jetti.
Nebári 54 mınýtqa sozylǵan básekede Býblık 4 eıspen kózge tústi. Oje-Alıassım 7 eıspen birge 6 breık-poınttyń tórteýin paıdalandy.
Felıks Oje-Alıassım fınalda álemniń 8-raketkasy, aýstralııalyq Aleks de Mınormen chempıondyq ataqty sarapqa salady.
Osylaısha, Aleksandr Býblık sporttyq jolynda alǵash ret Rotterdam jarysynyń jartylaı fınalyna deıin jetti.
Eske sala keteıik, budan buryn Aleksandr Býblıktiń Rotterdam týrnırinde fınalǵa shyǵý úshin talasatynyn jazǵan edik.
Sondaı-aq Anna Danılına Doha týrnıriniń chempıony atandy.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).