Aleksandr Býblık Rım masters týrnırin sátti bastady
Qazaqstandyq tennısshi bastapqy kezdesýin dúnıejúzilik reıtıngide 142-orynda turǵan ıspanııalyq Pedro Martınes-Porteromen ótkizdi.
A.Býblık qarsylasyn 6:3, 7:6 (7:4) esebimen tize búktirdi.
Bir saǵat 47 mınýtqa sozylǵan match barysynda qazaqstandyq sportshy 11 eıs jasap, 5 breık-poınttyń ekeýin óz esebine jazdy. Martınes-Portero 4 eıs, 1 breıkpen (5 breık-poınt) kózge tústi.
Aleksandr Býblık masters jarysynyń ekinshi aınalymynda álemniń 35-raketkasy, 20 jastaǵy amerıkalyq Ben Sheltonmen sheberlik baıqasady.
Júlde qory 7,7 mln eýrodan asatyn dodada ótken jyly álemniń 1-raketkasy, serbııalyq Novak Djokovıch úzdik shyqqan edi. Al A.Býblık alǵashqy aınalymnan asa almaǵan bolatyn.
Eske sala keteıik, budan buryn Qazaqstan jasóspirimderiniń irikteý týrnıriniń shırek fınalyna shyqqanyn jazǵan edik.
Tennısten álem chempıonaty irikteý týrnırinde Qazaqstan jasóspirimderi Aýstralııamen kezdesedi.