Aleksandr Býblık Parıj masters týrnıriniń úshinshi aınalymyna shyqty

<p>Qazaqstannyń birinshi, álemniń 33-raketkasy Aleksandr Býblık Parıj masters týrnıriniń úshinshi aınalymyna shyqty, dep habarlaıdy <a href="Kazinform" target="_blank" rel="noopener">Kazinform</a>.</p>

Qazaqstandyq tennısshi ekinshi aınalymda álemniń 20-raketkasy, Chılı ókili Nıkolas Harrımen sheberlik baıqasty.

Aleksandr Býblık qos taı-breıkte 7:6 (7:3), 7:6 (7:3) esebimen basym tústi.

Eki saǵatqa jýyq ýaqytqa sozylǵan tartysty básekede qazaqstandyq sportshy 10 eıs jasaǵanymen, 6 breık-poıntty óz paıdasyna sheshe alǵan joq. Esesine taı-breıkte sátti oınady. Chılılik tennısshi 6 eıspen (4 breık-poınt) shekteldi.

Birinshi aınalymda A.Býblık álemniń 14-raketkasy, amerıkalyq Frensıs Tıafony joldan taıdyrǵan edi.

Aleksandr Býblık shırek fınalǵa shyǵý úshin álemniń 3-raketkasy, reseılik Danııl Medvedev nemese reıtıngte 17-oryndaǵy bolgarııalyq Grıgor Dımıtrovtyń bireýimen talasady.

Eske sala keteıik, budan buryn tennısten álem chempıonatynda Qazaqstan jasóspirimder quramasynyń alǵashqy jeńisine qol jetkizgenin jazǵan edik.