Aleksandr Býblık Dýbaıda álemniń jetinshi raketkasyna jol berdi

ASTANA. QazAqparat – Qazaqstannyń birinshi, álemniń 46-raketkasy Aleksandr Býblık Dýbaı ATP 500 týrnıriniń shırek fınalyna shyǵa almady, dep habarlaıdy QazAqparat tilshisi.

Qazaqstandyq tennısshi ekinshi aınalymda álemniń 7-raketkasy, reseılik Danııl Medvedevpen sheberlik baıqasty.

Qarsylastar osyǵan deıin bes ret kezdesip, bárinde de reseılik sportshy jeńiske jetken edi.

Bul joly D.Medvedev birinshi partııada 6:4 esebimen basym tústi. Ol ekinshi sette de breık jasap, 3:1 esebimen alǵa ketti. Sodan keıin qarqynyn údete tústi – 6:2.

Bir saǵattan astam ýaqytqa sozylǵan báseke barysynda A.Býblık 5 eıspen ǵana kózge tústi. Reseılik tennısshi 5 eıspen birge 5 breık-poınttyń úsheýin paıdalana bildi.

D.Medvedev jartylaı fınalǵa shyǵý úshin álemniń 20-raketkasy, horvatııalyq Borna Chorıchpen talasady.

Eske sala keteıik, budan buryn qazaqstandyq jas tennısshiniń Eýropadaǵy úzdik 50 oıynshynyń qataryna kirgenin jazǵan bolatynbyz.

Sondaı-aq Gózal Aınıtdınova Astanadaǵy jarystyń ekinshi aınalymyna ótti.