Aleksandr Býblık Belgııadaǵy týrnırdiń shırek fınalyna ótti

<p>Qazaqstannyń birinshi, álemniń 36-raketkasy Aleksandr Býblık Antverpen (Belgııa) ATP 250 týrnıriniń shırek fınalyna ótti, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Jarystyń 3-raketkasy bolyp tirkelip, ekinshi aınalymnan bastaǵan qazaqstandyq tennısshi betashar kezdesýin dúnıejúzilik reıtıngide 72-orynda turǵan frantsııalyq Gregýar Barrermen ótkizdi.

Devıs kýbogin esepke almaǵanda, osyǵan deıingi dodalarda alty ret qatarynan utylǵan A.Býblıkke jeńis aýadaı qajet edi. Bul joly ol 1 saǵat 7 mınýtqa sozylǵan matchta qarsylasynan 6:4, 6:2 esebimen basym tústi. Báseke barysynda Býblık 11 eıs jasap, 3 breık-poıntty túgel paıdalandy.

Aleksandr Býblık jartylaı fınalǵa shyǵý úshin reıtıngide 226-satydaǵy taǵy bir frantsııalyq, 20 jastaǵy Djovannı Mpetchı Perrıkarmen talasady.

Qazaqstandyq tennısshi juptyq synda da reseılik Aleksandr Shevchenkomen birge jartylaı fınalǵa ótýge tyrysady. Olardyń qarsylasy – týrnırdiń 3-raketkalary, ulybrıtanııalyq Lloıd Glasspýl – monakolyq Hıýgo Nıs.

Júlde qory 673 630 eýroǵa baǵalanǵan Antverpen dodasy 22 qazanda máresine jetedi.

Eske sala keteıik, budan buryn Andreı Golýbevtiń juptyq synda Stokgolmde jarystyń 1-raketkasyn utqanyn jazǵan bolatynbyz.