Aleksandr Býblık Aýstralııadaǵy týrnırdiń fınalyna shyǵa almady

<p>Qazaqstannyń birinshi, álemniń 31-raketkasy Aleksandr Býblık Adelaıde (Aýstralııa) ATP 250 týrnıriniń fınalyna shyǵa almady, dep habarlaıdy <a href="https://kaz.inform.kz/?_gl=1*1cookbu*_ga*MTMxOTQ2NjU5MC4xNjk4Mzc1OTcw*_ga_Y44SMVECD5*MTY5ODM3NTk2OS4xLjAuMTY5ODM3NTk2OS42MC4wLjA.&amp;pk_vid=1dac2fba2c02ff6916983759715aaacc" target="_blank" rel="noopener">Kazinform</a>.</p>

Jarystyń 8-raketkasy bolyp tirkelgen qazaqstandyq tennısshi jartylaı fınalda dúnıejúzilik reıtıngide 62-orynda turǵan ulybrıtanııalyq Djek Dreıpermen baq synasty.

Tartysty ótken birinshi partııada ulybrıtanııalyq sportshy taı-breıkte basymdylyq tanytty – 7:6 (7:2).

Ekinshi sette esep 2:2 bolǵan mezette D.Dreıper breık jasap, alǵa ketti – 4:2. Aqyry sol basymdylyǵynan aıyrylǵan joq – 6:4.

Bir saǵat 35 mınýtqa sozylǵan báseke barysynda A.Býblık 7 eıs, 2 breıkpen (3 breık-poınt) erekshelendi.

D.Dreıper 8 eıs, 3 breıkke qol jetkizdi.

Djek Dreıper fınalda álemniń 32-raketkasy, chehııalyq Irjı Lehechkamen bas júldeni sarapqa salady.

Aleksandr Býblık úshin mańyzdysy 14 qańtarda bastalatyn Aýstralııa ashyq chempıonatynda barynsha sátti óner kórsetý bolmaq. Qazaqstandyq tennısshi alǵashqy aınalymda irikteý saıysy jeńimpazdarynyń birimen jol toqaılasady.

Eske sala keteıik, budan buryn Elena Rybakınanyń Aýstralııa ashyq chempıonatyna qatysý úshin Melbýrnǵa kelgenin jazǵan bolatynbyz.