Aleksandr Býblık álemdik reıtıngte rekordtyq kórsetkishke qol jetkizdi

ASTANA. QazAqparat – Galle (Germanııa) ATP 500 týrnıriniń chempıony atanǵan Qazaqstannyń birinshi raketkasy Aleksandr Býblık álemdik reıtıngte rekordtyq kórsetkishke qol jetkizdi, dep habarlaıdy QazAqparat tilshisi.

A. Býblık qazirgi kezde ATP Live reıtıngisinde 1 344 upaımen 48-den birden 27-orynǵa kóterilip tur.

Osylaısha, aldaǵy dúısenbide jańartylatyn ATP reıtıngisinde Aleksandr Býblık resmı túrde álemniń 27-raketkasy atanady. Bul qazaqstandyq tennısshi úshin rekordtyq nátıje bolmaq. Ol ótken jyl basynda álemdik reıtıngte 30-orynǵa deıin joǵarylaǵan edi.

Sonymen qatar, A. Býblık Galledegi jeńisi arqasynda 500 reıtıngtik upaıǵa ıe bolýmen qatar 410 515 eýro tabys tapty. Bul da onyń eń qomaqty tabysy bolyp esepteledi.

Eske sala keteıik, budan buryn Aleksandr Býblıktiń alǵash ret iri jarystyń jeńimpazy atanǵanyn jazǵan bolatynbyz.