Aleksandr Býblık AQSh-taǵy jarysty jeńispen bastady

ASTANA. QazAqparat – Qazaqstannyń birinshi, álemniń 46-raketkasy Aleksandr Býblık AQSh-tyń Fınıks qalasynda ótip jatqan ATP Challenger Tour Arizona Tennis Classic týrnırin jeńispen bastady, dep habarlaıdy QazAqparat tilshisi.

Jarystyń tórtinshi raketkasy bolyp tirkelgen qazaqstandyq tennısshi bastapqy kezdesýin reıtıngte 90-orynda turǵan amerıkalyq Denıs Kýdlamen ótkizdi.

Tartysty ótken matchta A.Býblık 7:6 (11:9), 4:6, 6:2 esebimen jeńiske jetti.

Eki saǵat 13 mınýtqa sozylǵan báseke barysynda Býblık 5 eıs jasap, 11 breık-poınttyń tórteýin paıdalandy. Qarsylasy 4 eıs, 3 breıkpen kózge tústi.

A.Býblık shırek fınalǵa shyǵý úshin álemniń 93-raketkasy, qytaılyq Chjı-Chjen Chjan nemese reıtıngte 130-satydaǵy aýstralııalyq Rınkı Hıdjıkatanyń bireýimen talasady.

Eske sala keteıik, budan buryn Elena Rybakınanyń Indıan-Ýells masters týrnıriniń shırek fınalyna ótkenin jazǵan bolatynbyz.