Alek Boldýınge kisi óltirdi degen aıyp taǵylady
The New York Times gazetiniń habarlaýynsha, túsirilim alańynda qarý-jaraqqa jaýapty Hanna Gýterres-Rıdke de osyndaı aıyp taǵylatyn bolady.
Operator Galına Hatchınsti baıqaýsyzda óltirdi dep tanylsa, ekeýi de 18 aıǵa deıin bas bostandyǵynan aıyrylýy múmkin. Alaıda, qylmystyń basqa jaǵdaıda bolǵany anyqtalsa, onda bul merzim 5 jylǵa deıin ulǵaıýy múmkin.
Qylmystyq aıyptaý kınoındýstrııadaǵy kópshilik úshin kútpegen jaǵdaı boldy. A.Boldýınniń zańgerler toby oǵan qarsy shyqty. Advokat Lıýk Nıkas sot ádiletsizdigimen kúresetinin málimdep, fılmniń repetıtsııasy kezinde klıentiniń tapanshasynda oq bolmaǵanyn aıtyp sendirýde.
Akterdiń ózi kinásin moıyndamaı, oǵan oqtalǵan myltyq bergeni úshin jaýapty dep túsirý tobynyń múshelerin sotqa berdi.
Alaıda Santa-Fe okrýginiń prokýrory Merı Karmak-Oltvıs A.Boldýın qarý-jaraq pen oq-dárilerdiń durys tekserilgenin qamtamasyz etýge mindetti jáne qaýipsizdiktiń negizgi talaptaryna sáıkes olardy eshqashan eshkimge baǵyttamaýy kerek dep sanaıdy.
Gýterres-Rıd advokaty onyń klıenti qarý-jaraq jasaýshy men qosalqy kómekshi qyzmetin birge atqarǵandyqtan, bul onyń qarýdy tolyqtaı tekserýge kedergi bolǵanyn atap ótti. Óz kezeginde, Gýterres-Rıd fılmge arnalǵan qarý-jaraq pen oq-dárilerdiń negizgi jetkizýshisi Set Kennıdi oq-dáriler men mýlıajdardy aralas etip jetkizdi dep aıyptap otyr.
Oqıǵa 2021 jyldyń 21 qazanynda Santa-Fe (Nıý-Meksıko) shetinde vestern túsirý kezinde oryn aldy. Túsirilim alańynda fılmniń rejısseri Djoel Soýsa da jaraqat alǵan.
Polıtsııa oqıǵa ornynan taǵy bes tiri oq-dári tapty, biraq tergeý olardyń túsirilim alańyna qaıdan kelgenin anyqtaǵan joq. Jaýap alý kezinde túsirý tobynyń músheleri qaıǵyly oqıǵa aldyndaǵy túni qyzmetkerlerdiń kópshiligi baspanaǵa jáne basqa da máselelerge shaǵymdanyp, jumystan shyǵyp ketkenin aıtty.
Bul oqıǵadan keıin túsirilim alańdaryndaǵy qaýipsizdik jáne qarý úshin jaýapkershilik máselesi qaıta kóterildi.
Osyǵan deıin Alek Boldýın kıno túsirilip jatqanda abaısyzda operatordy óltirip, rejısserdi jaraqattaǵanyn habarlaǵan bolatynbyz.
Foto: www.nbcnews.com