Alek Boldýın atyp óltirgen operator: Qarý-jaraqqa jaýapty adam 1,5 jylǵa sottaldy

<p>ASTANA. KAZINFORM — Nıý-Meksıko soty akter Alek Boldýınniń myltyǵyn abaısyzda atys patrondarymen toltyrǵan jaýapty adamdy operatordyń ólimine eriksiz kináli dep tapty, dep habarlaıdy <a href="https://www.dw.com/ru/strelba-na-semkah-filma-s-bolduinom-butaforu-dali-15-goda/a-68835105" target="_blank" rel="noopener">DW</a> aqparat agenttigi.  </p>

27 jastaǵy rekvızıtor Hanne Gýterres-Rıd gollıvýdtyq «Tot» fılminiń túsirilim alańynda akter Alek Boldýınniń qolynda atys oǵy bar tapansha bolyp, operator Galına Hatchınstiń ólimine ákep soqtyrǵanyna baılanysty sottaldy. 

Dúısenbi, 15 sáýirde Nıý-Meksıko soty ony abaısyzda adam óltirdi dep tanyp, 18 aıǵa bas bostandyǵynan aıyrý týraly úkim shyǵardy.

«Eger siz bolmasańyz, mıss Hatchıns tiri júrer edi. Onyń kúıeýi jalǵyz qalmaı, al kishkentaı balanyń anasy bolar edi», — dep atap ótti sýdıa Gýterres-Rıdke. 

Alqabıler áıeldi naýryz aıynyń basynda kisi óltirgeni úshin kináli dep tapty.

Prokýrorlar onyń óz mindetine salǵyrt qarap, túsirilim alańynda qoldanylǵan 20-dan astam qarýdy durys saqtamaǵanyn aıtty.

Óz kezeginde advokattar qaýipsizdik erejesin túsirý tobynyń basqa músheleri de buzǵanyn,  qaıǵyly jaǵdaılar operatordyń ólimine ákelip soqqanyn alǵa tartyp, shartty túrde sottaýdy surady.

Oqıǵa 2021 jyldyń 21 qazanynda Santa-Fe (Nıý-Meksıko) shetinde vestern túsirý kezinde oryn aldy.

Túsirilim alańynda fılmniń rejısseri Djoel Soýza da jaraqat alǵan.  

Polıtsııa oqıǵa ornynan taǵy bes tiri oq-dári tapty, biraq tergeý olardyń túsirilim alańyna qaıdan kelgenin anyqtaǵan joq.

Jaýap alý kezinde túsirý tobynyń músheleri qaıǵyly oqıǵa aldyndaǵy túni qyzmetkerlerdiń kópshiligi baspanaǵa jáne basqa da máselege shaǵymdanyp, jumystan shyǵyp ketkenin aıtty.

Bul oqıǵadan keıin túsirilim alańyndaǵy qaýipsizdik jáne qarý úshin jaýapkershilik máselesi qaıta kóterildi.

Oq-dáriniń túsirilim alańyna qaıdan kelgeni áli belgisiz. 

Osy oqıǵaǵa baılanysty Alek Boldýınge de adam óltirdi degen aıyp taǵyldy. Onyń soty 10 shildege belgilengen.