Aldymen elge kelgen baýyrlarymyzdyń jaǵdaıyn jasaýymyz kerek - Zaýytbek Turysbekov

ASTANA. QazAqparat - Aldymen elge kelgen baýyrlarymyzdyń jaǵdaıyn jóndesek degen nıetpen jumys jasap jatyryz. Bul týraly búgin Aqparat jáne qoǵamdyq damý mınıstrliginiń keńeıtilgen alqa májilisinde Dúnıejúzi qazaqtary qaýymdastyǵy tóraǵasynyń birinshi orynbasary Zaýytbek Turysbekov aıtty, dep habarlaıdy QazAqparat tilshisi.

«Qazaqta «Elge el qosylsa, qut» degen sóz bar. Elbasynyń saıasatynyń arqasynda 27 jylda 1 mln baýyrymyz elge oraldy. Olardyń birazy úısiz-kúısiz, jumyssyz júrgen jaǵdaıy bar. Shet memlekette júrgen qazaqtardyń kóbi osy jaǵdaıdyń barlyǵyn biledi. Sol sebepten aldymen elge kelgen baýyrlarymyzdyń jaǵdaıyn jóndesek degen nıetpen biraz jumys jasap jatyrmyz», - dedi Z.Turysbekov.

Osy rette ol Ońtústik Qazaqstan oblysynyń ákimi bolyp turǵan kezde Ózbekstannan ońtústik óńirge 20 myńǵa jýyq qandasymyz qonystandyrylǵanyn aıtty. Olardyń qazir jaǵdaı jaqsy, bári jumyspen qamtamasyz etilgen. Ótken jyly ár úı jylyjaıdan ortasha eseppen 12 myń dollar tabys tapqan. Degenmen, Astanadaǵy EKSPO qurylysyna kelgen 1282 otbasy elordada qalýǵa sheshim qabyldap, úı salýǵa jer suraǵan.

«Sodan Arshaly aýdanynan 200 gektar jerdi satyp aldyq. Sebebi jer joq. 2 jyl tóńireginde qujattaryn rettedik. Endi qazir ınfraqurylymynyń jobasyn daıyndap jatyrmyz. Biraq, Arshaly aýdanynda oǵan 35 mln teńge tabylmaı jatyr. Osy másele tóńireginde jumys istep jatyrmyz. 2000 gektar jerde 1282 kottedj bolady. Al olardy jumyspen qamtý úshin taǵy 300 gektar jer alyp, oǵan jylyjaı salamyz. Onda gúl, kókónis ósirip, Astanaǵa jetkizýge árekettenemiz», - dedi ol.