Aldııar Baırakımovtyń fılmi Mınskide úzdik stsenarıı júldesin ıelendi

ASTANA. QazAqparat - «Na granı» kórkem fılmi Mınskide, qarashanyń 2 men 9 aralyǵynda ótken «Lıstopad» halyqaralyq kınofestıvaliniń jasóspirimder konkýrsynda qazylar alqasynyń «Úzdik stsenarıı»  arnaıy júldesin jeńip aldy, dep habarlaıdy QazAqparat «Qazaqfılm» kınostýdııasyna silteme jasap.

Jasóspirimder «Lıstopadık» konkýrsynda Belarýs, Estonııa, Taıvan, Serbııa, Italııa jáne Kenııadan qatysýshylar baq synaǵan. 

Atalǵan kınotýyndy bir-birine múldem uqsamaıtyn, alaıda taǵdyrlary kezdeısoq toǵystyrǵan jasóspirimder týraly baıandaıdy.

«Jeńisti kútpegen edim. Óıtkeni myqty konkýrs jáne qatysýshylar da osal emes bolatyn. Qobaljyǵanym sonshalyq, sahnaǵa shyqqanda oıymdy jınaqtaı almaı qınaldym. Menimen qatar, serbııalyq fılmge Belarýs elindegi ıÝNISEF qory júlde tabystady. Osy fılmdi túsirgen topqa rahmet aıtamyn. Fılmniń qosalqy stsenarın jazǵan Venera Qaıyrjanova men Bolat Ysqaqovty da quttyqtaımyn.  Óıtkeni, qysqa merzimde stsenarııdi tolyq jazýǵa atsalysty. Fılmdi qarapaıym kórermen de kásibı orta da jaqsy qabyldap jatqany qatty qýantady. Fılmniń bul ekinshi festıvali jáne alǵashqy júldesi», - dedi fılmniń rejısseri Aldııar Baırakımov.
Jyl saıyn qarasha aıynda «Listapad» HKF Mınskige álemniń ár elinen fılmder ákeledi. Negizgi konkýrstyq baǵdarlamasynda jańa derekti jáne kórkem fılmderge basymdyq beredi. Olardyń qatarynda: TMD, Ortalyq jáne Ońtústik-Shyǵys Azııa, Baltyq elderi, Shyǵys jáne Ortalyq Eýropa bar. Osy óńirdiń halyqaralyq festıvalderden úzdik dep tanylǵan fılmderi Mınski HKF júldesine talasady. 

Eske sala ketsek, buǵan deıin «Na granı» fılmi 2-9 qyrkúıek aralyǵynda Reseıdiń Anapa qalasynda ótken XXVII «Kınoshok» ashyq kınofestıvaliniń baıqaýyna qatysqan bolatyn.