Aldanǵan úleskerler arnaıy úkimettik komıssııa qurýdy usynyp otyr
Sol sebepti aldanǵan azamattar arnaıy úkimettik komıssııa quryp, burynǵy mexanızm boıynsha kómek berýdi surap otyr, dep xabarlaıdy QazAqparat tilshisi.
"Resmı málimetke sáıkes, búginde qala aýmaǵynda 59 problemalyq nysan bar. Ótken jyldyń basynda 36 nysan boldy. Odan keıin 46, endi 60-qa taıap qaldy. Negizi, ákimdik bul máseleni sheshe almaı otyr. Sosyn arnaıy vedomstvoaralyq komıssııa úleskerler máselesin sheshýge kúsh salyp jatyr dese de, onyń talap-tilekteri tek usynym retinde ǵana beriledi. Sonyń saldarynan úleskerlerdiń problemasy atalǵan komıssııanyń otyrystarynda jyldap qaralady. Biraq nátıje joq", - deıdi "Aısanam DeLuxe-Ýspex" turǵyn úı-qurylys kooperatıviniń tóraǵasy Murat Qasenov.
Onyń aıtýynsha, búginde turǵyn úı-qurylys kooperatıvteri de atalǵan máseleni sheshe almaıdy. Sebebi dardaı aty bar qurylys kompanııalary problemalyq nysandardy almaı jatqanda kooperatıvtiń ondaı jumysqa qaýqary esh jetpeıdi. "Sondyqtan biz arnaıy úkimettik komıssııany qurýdy talap etip otyrmyz. Ol komıssııa barlyq nysandardy aralap, óz qorytyndysyn shyǵarýy qajet. Sosyn tıisti sharalardy qolǵa alýy tıis. Qazirgi kezde arnaıy mexanızm bar. Ony eshkim toqtatqan joq. Buǵan deıin sol mexanızm arqyly úleskerlerdiń máselesin sheshken. Demek, ol arqyly taǵy da kómek berýge bolady", - dep atap kórsetti Qasenov.
Aıta keteıik, búgin elordada ótken baspasóz máslıxatynda Qazaqstan úleskerleri qaýymdastyǵynyń basqarma múshesi Janqozy Bákibaev "Azbýka jılıa" qurylys kompanııasynyń burynǵy basshysy, eks-depýtat Erqanat Taıjanovty elge qaıtarýǵa qatysty xatqa Avstrııa elshisiniń ǵana emes, sol eldiń kantsleriniń de jaýap bergenin málimdedi.