Aldaǵy jyly ulttyń rýhyn kóteretin mańyzdy is-sharalar ótedi - Memleket basshysy

ASTANA. QazAqparat - Biz kele jatqan Jańa jyldan zor úmit kútemiz. Bul týraly Memleket basshysy qazaqstandyqtardy Jańa jylmen quttyqtaýynda aıtty, dep habarlaıdy QazAqparat.

«Biz kele jatqan Jańa jyldan zor úmit kútemiz. Barshańyzǵa málim, álemdegi ahýal asa kúrdeli. Soǵan qaramastan, kelesi jyl elimiz úshin jemisti jyl bolady dep senemiz. Aldymyzda aýqymdy jumys tur, kóptegen josparymyzdy júzege asyrýymyz kerek. Negizgi maqsat – memleketimizdi nyǵaıtý jáne halqymyzdyń ál-aýqatyn arttyrý. Men Prezıdent retinde osy maqsattarǵa jetý úshin barlyq kúsh-jigerimdi salamyn. Aldaǵy jyly ulttyń rýhyn kóteretin mańyzdy is-sharalar ótedi. Biz bir el bolyp, bir halyq bolyp, birlese eńbek etip, Jańa jylda jańa tabysqa jetemiz. Men buǵan kámil senemin», - dedi QR Prezıdenti.