Aldaǵy jyly eki jol ýchaskesinde aqyly júıeni engizý kózdelip otyr

ASTANA. QazAqparat - Qazaqstanda 2020 jylǵa deıin 7 myń shaqyrymǵa tarta avtojoldar aqyly bolady. Bul týraly búgin Ortalyq kommýnıkatsııalar qyzmetindegi baspasóz máslıhatynda «QazAvtojol» UK Basqarma tóraǵasynyń orynbasary Ulan Álipov málim etti.

«Aqyly joldar boıynsha josparda biz 2020 jylǵa deıin respýblıkadaǵy 7 myń shaqyrymǵa jýyq joldardy aqyly negizge ótkizýdi qarastyrýdamyz. Kelesi jyly «Astana-Atbasar» jáne «Qyzylorda-Shymkent» eki ýchaskeden bastaımyz»,-dedi ol.

U. Álipovtiń sózine qaraǵanda, «Astana-Atbasar» jolynda tek júk kólikterinen aqy alynsa, «Qyzylorda -Shymkent» joly barlyq kólik túrleri úshin aqyly bolady dep kútilýde.

«Budan ary qaraı joldardyń qurylystary aıaqtalǵan saıyn aqyly tártip engiziledi. Bul - bıýdjetti joldy kútip ustaý qarajatynan bosatýǵa kózdelgen sharalar. Osy oraıda «Astana-Býrabaı» jolynan tıisti nátıjeni kórip otyrmyz, ıaǵnı joldy kútip ustaý shyǵyndary tolyqtaı jabylyp otyr»,-dedi ol.

U. Álipovtiń aıtýynsha, «Astana-Býrabaı» aqyly avtobanynda bıyl 1 mlrd. 129 mln. teńge jınaý josparlanyp otyr.