Aldaǵy jylý berý maýsymynda el turǵyndaryna qansha kómir kerek

ASTANA. QazAqparat – Aldaǵy jylý berý maýsymynda kommýnaldyq sala men turǵyndarǵa 9 mln tonnadan astam kómir kerek. Bul týraly Indýstrııa jáne ınfraqurylymdyq damý mınıstrligi Indýstrııalyq damý komıteti tóraǵasynyń orynbasary Turar Jolmaǵambetov aıtty, dep habarlaıdy QazAqparat tilshisi.

Vedomstvo málimetine qaraǵanda, bıylǵy 7 aıdaǵy jedel derekter boıynsha 61,7 mln tonnaǵa jýyq kómir óndirildi. Al energetıkalyq keshenderge jóneltilgen kómir kólemi 36,8 mln tonna, kommýnaldyq-turmystyq sektorǵa 3,9 mln tonna, eksportqa 18,3 mln tonna bolǵan.

T.Jolmaǵambetovtyń aıtýynsha, jylý berý maýsymy aldynda halyq pen kommýnaldyq-turmystyq sektor úshin kómir tıeýge jyljymaly qurammen qamtamasyz etý jónindegi is-sharalarǵa arnalǵan jol kartasy ázirlengen.

«Kommýnaldyq-turmys sektory men el halqyna qajet kólem 9,1 mln tonna boldy. Onyń ishinde kommýnaldyq-turmystyq salaǵa 2,3 mln tonna, al halyqqa 6,8 mln tonna kerek. Qazir 9,1 mln tonnanyń 2 mln tonnasy jetkizildi», - dedi mınıstrlik ókili Ortalyq kommýnıkatsııalar qyzmetindegi baspasóz máslıhatynda.

Byltyrmen salystyrǵanda kómir baǵasy ortasha eseppen 15 paıyzǵa ósti. Negizgi razrezderdiń ózinde áleýmettik kómirdiń tonnasy osylaı baǵalanǵan:

- «Shubarkól kómir» – 7 570 teńge;

- «Qarajyra» – 9 000 teńge;

- «Shubarkól premıým» – 9 000 teńge;

- «Maıkóben-Vest»» – 6 700 teńge.