Aldaǵy jyldary Qazaqstan aýmaǵynda qansha shaqyrym jol salynady
QR Úkimet úıinde 2020-2025 jyldarǵa arnalǵan jańa «Nurly jol» memlekettik baǵdarlamasy bekitildi. Onyń aıasynda respýblıkalyq mańyzy bar avtomobıl joldarynyń qurylysy men rekonstrýktsııasyna qatysty 27 jobanyń iske asyrylýy qarastyrylǵan.
«Qazaqstandaǵy avtomobıl joldarynyń jalpy uzyndyǵy 95,9 myń shaqyrymdy quraıdy. «Nurly jol» memlekettik baǵdarlamasynyń ekinshi besjyldyǵynda respýblıkalyq mańyzy bar joldardyń qurylysy men rekonstrýktsııasy aıasynda 13 jańa joba iske asyrylmaq. Jańa jobalar aıasynda tıisti jumystarmen joldardyń shamamen 7 myń shaqyrymy qamtylatyn bolady. Sonymen qatar, joǵaryda atalǵan ýaqyt ishinde 14 aýyspaly jobany da júzege asyrý qarastyrylǵan. Aýyspaly jobalar aıasynda paıdalanýǵa beriletin joldardyń uzyndyǵy 3,8 myń shaqyrymdy quraıdy. Osylaısha, Qazaqstanda 2025 jyldyń sońyna deıin respýblıkalyq mańyzy bar joldardyń 10 myń shaqyrymynnan astam ýchaskede qozǵalys ashylady dep kútilýde», - delingen QR Indýstrııa jáne ınfraqurylymdyq damý mınıstrligi málimetinde.
Bul baǵyttaǵy jumystar 2025 jyly jaqsy jáne qanaǵattandyrarlyq jaǵdaıdaǵy respýblıkalyq joldardyń úlesin 100 paıyzǵa deıin jetkizýge múmkindik beredi.
Aıta keteıik, 2020 jáne 2025 jyldardyń aralyǵynda jalpy paıdalanymdaǵy oblystyq jáne aýdandyq mańyzǵa ıe avtomobıl joldaryn damytýdy qarjylandyrýǵa parıtetti negizde respýblıkalyq jáne jergilikti bıýdjetterden shamamen 1 trln teńge bólinetin bolady. Atalmysh qarjy esebinen jergilikti mańyzy bar joldardyń 20 myńnan astam shaqyrymy qalpyna keltirilmek. Osy rette jaqsy jáne qanaǵattandyrarlyq jaǵdaıdaǵy jergilikti joldardyń úlesi 95% jetkiziledi dep josparlanǵan.