Aldaǵy jekpe-jekke eki ese qatty daıyndalamyn - Qanat Islam
«Biz bir aıy boıy Almatyda daıyndaldyq. Endi, jekpe-jekke deıingi daıyndyqty Astanada ótkizemiz degen jospar bar. Endi, qarsylasym týraly aıtar bolsaq, men sııaqty áli birde-ber ret jeńilip kórmegen. Ony ońaı qarsylas dep sanaýǵa bolmaıdy. Ózim barlyq qarsylastarǵa tyńǵylyqty daıyndalyp shyǵamyn. 24 kezdesýimniń barlyǵynda da solaı boldy. Meniń qarsylasym da tyńǵylyqty daıyndalyp jatyr dep oılaımyn. Óıtkeni ol da ózim sııaqty bir eldiń erkesi, myqty, áli jeńilmegen. Sol sebepti basqalarǵa qaraǵanda oǵan eki ese qatty daıyndalamyn», - dedi Qanat Islam jýrnalısterge bergen suhbatynda.
Almatyda barlyq daıyndyq jattyǵýlary ulttyq quramamen birge ótti. Qazirgi kezde komandanyń boksshylary Germanııada ótetin Álem birinshiligine daıyndalyp jatyr. «Biz bir-birizge jaqsy kómektestik. Óıtkeni men ózim áýesqoı bokstan ketkennen keıin burynǵy jattyǵýlardyń paıdasy bar. Sol úshin Myrzaǵalı aǵamyzǵa da alǵysym sheksiz. Kóp kómegin jasady. Onyń barlyǵyn osy jolǵy jekpe-jekte kóremiz. Negizi, munyń barlyǵy Táýelsizdiktiń arqasy dep oılaımyn», - dep atap kórsetti boksshy «Qazaq».
Aıta keteıik, 9-qyrkúıekte Astanadaǵy «Saryarqa» velotregi ǵımaratynda Qanat Islam (24-0, 19KO) kanadalyq Brendon Kýkpen (18-0, 11KO) judyryqtasady. Boksshylar birinshi orta salmaqtaǵy IBF tıtýlyna úmitkerlik úshin talasady. Osy jekpe-jektiń anderkartynda 8 qazaqstandyq boksshy óner kórsetedi. Olar - Jańqosh Turarov (21-0, 15KO), Jánibek Álimhanuly (1-0, 1KO), Meıirim Nursultanov (3-0, 2KO), Rýslan Myrsataev (3-0, 3KO), Álı Ahmedov (7-0,5KO), Aıdos Erbosynuly (6-0, 6KO), Dımash Nııazov (11-0-3, 5KO) jáne Nursultan Jańabaev (2-0, 1KO). Barlyq boksshylarymyz osy ýaqytqa deıin birde-bir ret jeńilmegen.