Aldaǵy úsh jylda elimizde 9 jańa sý qoımasy salynady - Serikqalı Brekeshev

KÓKShETAÝ. QazAqparat - Elimizde 2025 jylǵa deıin 6 aımaqta 9 jańa sý qoımasyn salý josparlanǵan. Onyń ishinde Aqmola oblysynda syıymdylyǵy 833 mıllıon tekshe metr bolatyn Buzylyq sý qoımasy bar. Bul týraly Kókshetaýda ótken brıfıngte QR Ekologııa, geologııa jáne tabıǵı resýrstar mınıstri Serikqalı Brekeshev málim etti, dep habarlaıdy QazAqparat tilshisi.

Mınıstrdiń aıtýynsha, sońǵy 5 jylda elimizde 16 gıdrotehnıkalyq qurylys nysany qalpyna keltirilgen.

Almaty, Aqtóbe, Shyǵys Qazaqstan, Jambyl Qaraǵandy, Qyzylorda jáne Túrkistan oblystarynda 120 myńnan astam turǵyny bar 16 eldi meken úshin sý basý qaýpi joıyldy.

2025 jylǵa deıin Aqmola oblysynda 3 gıdrotehnıkalyq qurylys qalpyna keltiriledi. Atap aıtqanda, bul - Astana, Qoıandy jáne Podlesnenskoe sý qoımalary.

«Elimizde 2025 jylǵa deıin 6 aımaqta 9 jańa sý qoımasyn salý josparlanýda, onyń ishinde Aqmola oblysynda sý jınaý syıymdylyǵy 833 mıllıon tekshe metr bolatyn Buzylyq sý qoımasy bar», - dedi QR Ekologııa, geologııa jáne tabıǵı resýrstar mınıstri Serikqalı Brekeshev.

Mınıstr atap ótkendeı, aýyz sýmen qamtamasyz etý maqsatynda Aqmola oblysynda ótken jyly eki sý qubyry nysanynyń qurylys aıaqtalǵan.

«Ótken jyly Makınsk toptyq sý qubyry iske qosyldy. Sonyń nátıjesinde 18 myń turǵyny bar Makınsk qalasynda sýmen qamtamasyz etý jaqsartyldy. Sondaı-aq Nura toptyq sý qubyrynyń uzyndyǵy 16 shaqyrymdy quraıtyn 9 apatty ýchaskesin qalpyna keltirý jumysy aıaqtaldy. 2025 jylǵa deıin Nura toptyq sý qubyrynyń edáýir tozýyna baılanysty ony qaıta qurýdy júıeli jáne kezeń-kezeńimen júrgizýdi josparlap otyrmyz», - dep túıindedi Serikqalı Brekeshev.