Aldaǵy úsh jylda Atyraý oblysynda 55 myń adam jumystan bosaıdy – Memleket basshysy

NUR-SULTAN. QazAqparat – Aldaǵy úsh jylda Atyraý oblysynda 55 myń adam jumystan bosaıdy. Bul týraly Atyraý oblysynyń áleýmettik-ekonomıkalyq damý máseleleri jónindegi keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Qazirgi tańda Atyraý oblysyndaǵy turmys deńgeıi elimizdiń ózge óńirlerine qaraǵanda joǵary. Ortasha jalaqy 358 myń teńge, bul – jalpy respýblıkalyq kórsetkishten 1,6 ese joǵary (Qazaqstan boıynsha 222,9 myń teńge). Degenmen, munda júzege asyrylyp jatqan «Bolashaqta keńeıý jobasy» jaqynda aıaqtalady. Aldaǵy úsh jylda 55 myń adam jumystan bosaıdy. Oblys ákimi onyń 31 myńyn eńbekpen qamtýdy josparlap otyr. Bul Atyraý oblysynyń ǵana mindeti emes ekenin eske salamyn», - dedi Memleket basshysy.

QR Prezıdenti joba aıasynda vahtalyq tásilmen ózge aımaqtardyń turǵyndary da jumys istep júrgendigin atap ótti.

«Úkimetke jumystan bosatylatyn barlyq jumysshylardy birtindep eńbekpen qamtý máselesin pysyqtaýdy tapsyramyn»,- dedi Qasym-Jomart Toqaev.