Aldaǵy ýaqytta yntymaqty jáne bazalyq zeınetaqy ındeksatsııalanady – Smaıylov
«Áleýmettik-eńbek salasy – Úkimettiń jumysyndaǵy basym baǵyttardyń biri. Qazir búkil álemde osy salany reformalaý máselesi mańyzdy bolyp tur. Ol ataýly áleýmettik qoldaýdy kúsheıtýge, onyń túrleri men qyzmet kórsetý formalaryn keńeıtýge baǵyttalady. Sonymen birge, azamattardy áleýmettik kómek alýdyń múmkindigi týraly proaktıvti túrde habardar ete otyryp, memlekettik qyzmetterdi qoljetimdi etý mehanızmderi engizilýde. Al, eńbek naryǵynda jumysty barynsha berilip isteıtin ári shyǵarmashylyqqa beıim, «ıkemdi» daǵdylarǵa suranys artyp keledi», - dedi Úkimet basshysy búgin Eńbek jáne halyqty áleýmettik qorǵaý mınıstrliginiń keńeıtilgen alqa májilisinde.
Álıhan Smaıylov osyǵan baılanysty 2023 jyly Eńbek mınıstrliginiń aldynda birqatar mańyzdy mindet turǵanyna nazar aýdartty.
«Eń aldymen, Memleket basshysynyń Joldaýynda, Úkimettiń keńeıtilgen otyrysynda, saılaýaldy baǵdarlamasynda aıtylǵan tapsyrmalardy iske asyrýǵa kúsh jumyldyrý kerek. Azamattardyń barlyq sanattaryn týǵannan bastap qartaıǵan shaǵyna deıingi áleýmettik qorǵaý, sondaı-aq halyqty nátıjeli jumyspen qamtý – bizdiń ortaq mindetimiz. Ótken jyly bul baǵytta Memleket basshysy qoıǵan birqatar mindetter iske asyryldy. Zeınetaqy, járdemaqy jáne áleýmettik kómek ýaqtyly tólenip keledi», - dedi ol.
Premer-Mınıstrdiń dereginshe, halyqty áleýmettik qorǵaýǵa jumsalǵan shyǵystar 4,4 trln teńgeni qurady. Bul respýblıkalyq bıýdjettiń 24 paıyzyn quraıdy.
«2022 jyly yntymaqty jáne bazalyq zeınetaqy mólsheri 2 ret ındeksatsııalandy. Bul jumys ary qaraı da jalǵasady jáne bazalyq jáne yntymaqty zeınetaqy aldaǵy ýaqytta taǵy da birneshe ret ındeksatsııalanady dep josparlap otyrmyz. Az qamtylǵan 724 myń azamatqa ataýly áleýmettik kómek berildi», - dedi Álıhan Smaıylov.