Aldaǵy ýaqytta Qasym-Jomart Toqaev Pákistanǵa resmı saparmen barady
Sapar barysynda Erlan Qoshanov Pákistan Ulttyq Assambleıasynyń spıkeri Radja Pervez Ashrafpen kezdesip, eki el arasyndaǵy parlamentaralyq yntymaqtastyq máselelerin talqylady.
Májilis spıkeri áriptesin Pákistan Táýelsizdiginiń jáne Parlamentiniń 75 jyldyǵymen quttyqtady. Baýyrlas elge baq-bereke tilep, Pákistan Qazaqstannyń Ońtústik Azııadaǵy mańyzdy seriktesi ekenin atap ótti.
«Bıyl elderimiz arasynda dıplomatııalyq qarym-qatynastyń ornaǵanyna 30 jyl toldy. Osy ýaqyttyń ishinde Qazaqstan men Pákistan jan-jaqty yntymaqtastyq ornatyp, biraz tabysqa qol jetkizdi»,– dedi Erlan Qoshanov.
Májilis Tóraǵasy qazirgi tańda Qazaqstanda mańyzdy tarıhı oqıǵalar bolyp, Prezıdent Qasym-Jomart Toqaevtyń bastamasymen aýqymdy saıası reformalar júrgizilip jatqanyna nazar aýdardy.
«20 qarashada Qasym-Jomart Toqaev Qazaqstan Prezıdenti bolyp saılandy. Kelesi jyly Parlament saılaýyn ótkizýdi josparlap otyrmyz. Bul – bizdiń elimizdegi parlamentarızmniń damý tarıhyndaǵy jańa kezeń. Jańa zańnamaǵa sáıkes saıası partııalardy tirkeý rásimderi edáýir jeńildedi. Nátıjesinde saılaýdan keıin Májiliste saıası partııalardyń sany artady dep oılaımyz. Bul Parlamenttiń qoǵamdaǵy róli men bedelin nyǵaıtýǵa septigin tıgizedi», – dedi Erlan Qoshanov.
Óz kezeginde, Pákistan Ulttyq Assambleıasynyń spıkeri Radja Pervez Ashraf parlamenttik dıplomatııanyń mańyzdylyǵyna toqtaldy.
«Parlamentaralyq yqpaldastyq jalǵasa beredi. Bizdiń áleýetimiz zor. Energetıka, qaýipsizdik, azyq-túlik, áskerı saladaǵy áriptestikti damyta alamyz. Sonymen birge baýyrlas halyqtarymyzdyń dostyǵyn nyǵaıtý mańyzdy. Bizdiń maqsatymyz – Ortalyq Azııa elderimen baılanysty kúsheıtý», – dedi Pervez Ashraf.
Qazirgi ýaqytta eki el parlamentteriniń baılanysy jan-jaqty damyp kele jatyr. «Qazaqstan-Pákistan» dostyq toby tabysty qyzmet etýde. Búgin eki el depýtattary parlamentaralyq yntymaqtastyqty arttyrýǵa baǵyttalǵan osy toptyń alǵashqy otyrysyna qatysty. Basqosýda dostyq toptar men komıtetter zańnama salasynda tájirıbe almasý jóninde kelisti.
Sapar aıasynda Erlan Qoshanov Pákistannyń Premer-mınıstri Shahbaz Sharıfpen kezdesti. Onda Májilis tóraǵasy Pákistan Premer-mınıstrine Qazaqstan Prezıdentiniń ystyq sálemi men zor yqylasyn jetkizdi.
«Sizdiń Qasym-Jomart Toqaevpen qysqa ýaqyttyń ishinde eki ret kezdesýińiz elderimizdiń dostyǵyn tereńdetip, baılanysymyzdy arttyra túsýde. Osyndaı joǵary deńgeıdegi qatynastarymyzdyń jalǵasy retinde Qazaqstan Prezıdenti Qasym-Jomart Toqaevtyń aldaǵy ýaqytta Islamabadqa resmı sapary josparlanyp otyr. Bul sapar dostas elder arasyndaǵy tyǵyz qarym-qatynasty jańa deńgeıge kóterip, odan ári damýyna zor serpin beretinine senimdimin», – dedi Májilis spıkeri.
Erlan Qoshanov Pákistan memleketi Qazaqstan Táýelsizdigin eń alǵashqylardyń biri bolyp tanyǵan el ekenin erekshe atap ótti.
Qazirgi tańda Qazaqstan men Pákistan arasyndaǵy saýda-ekonomıkalyq qarym-qatynas jyl sanap artyp keledi. Byltyr ózara taýar aınalymy 100 mıllıon dollarǵa jýyqtady. Aldyńǵy jylmen salystyrǵanda eki ese ulǵaıyp otyr.
Pákistan Premer-mınıstri Shehbaz Sharıf eki jylda Qazaqstan men Pákistan arasyndaǵy saýda-sattyqty eki ese arttyrǵa múmkindik bar ekenine basa mán berdi.
«Búgingi Ulttyq Assambleıanyń spıkerimen kezdesýińiz tabysty boldy dep oılaımyn. Parlamentterimizdiń baılanysy nyǵaıyp, ekonomıkalyq yntymaqtastyqty kúsheıtýge barlyq múmkindik bar. Ásirese, saýda-sattyq, logıstıka, aýyl sharýashylyǵy, bilim men ǵylym salasyndaǵy seriktestiktiń áleýeti zor. Prezıdent Toqaevqa meniń ystyq sálemimdi jetkizýińizdi suraımyn. Aldaǵy kezdesýimizdi asyǵa kútemin jáne jemisti ótetinine kámil senemin», – dedi Shehbaz Sharıf.
Sonymen qatar Májilis tóraǵasy Pákistan Prezıdenti Arıf ýr-Rehman Alvımen jáne Pákistan Senatynyń tóraǵasy Mýhammad Sadık Sandjranımen jeke-jeke kezdesti.
Májilis tóraǵasy 230 mıllıonnan astam halqy bar Pákistan naryǵy Qazaqstan úshin úlken qyzyǵýshylyq týdyryp otyrǵanyna mán berdi.
«Pákistannyń teńiz porttaryna shyǵý elimiz úshin tıimdi bolar edi. Biz astyq, energoresýrstar jáne basqa da taýarlardy eksporttaý múmkindigin pysyqtap jatyrmyz. Bizge óńirlik tranzıttik jáne logıstıkalyq ınfraqurylymdy damytýdyń mańyzy zor», – dedi Erlan Qoshanov.
Sondaı-aq kezdesýlerde halyqaralyq, mádenı-gýmanıtarlyq yntymaqtastyq máseleleri de talqylandy.
Taraptar dostyq baılanystar qos el kóshbasshylarynyń ózara tıimdi yqpaldastyǵynyń jemisi ekenine nazar aýdardy. Ekijaqty baılanysty kúsheıtýge baǵyttalǵan bul jumystar Parlament deńgeıinde qyzý jalǵasady.