Aldaǵy referendým – bul halyq bıliginiń jarqyn kórinisi - senator

NUR-SULTAN. QazAqparat - Qazaqstan Respýblıkasy Parlamenti Senatynyń depýtattary Álı Bektaev pen Álimjan Qurtaev Shymkent qalasyna jumys sapary barysynda Á.Qýatbekov atyndaǵy Halyqtar dostyǵy ýnıversıtetiniń oqytýshylarymen jáne stýdentterimen kezdesti.

Bul týraly QazAqparat QR Parlamenti Senatynyń baspasóz qyzmetine silteme jasap habarlaıdy.

Senatorlar kezdesýge qatysýshylarǵa elimizdiń Negizgi Zańyna engizýge usynylǵan túzetýler týraly egjeı-tegjeıli aıtyp berdi.

Depýtattar Konstıtýtsııany ózgertý týraly sheshimniń elimizdiń árbir azamaty óz tańdaýyn jasaı alatyn jalpy respýblıkalyq referendýmda qabyldanýy mańyzdy ekenin erekshe atap ótti.

«Aldaǵy referendým – bul halyq bıliginiń jarqyn kórinisi, árbir qazaqstandyq óziniń azamattyq ustanymyn bildirý arqyly jańa Qazaqstandy qurýǵa qosqan naqty úlesin kórsetedi», - dep atap ótti senator Álı Bektaev.

Oqytýshylar men stýdentter kezdesý barysynda jastardyń jumyssyzdyǵy, jataqhananyń jetispeýi, qazaq tiliniń qoldanylý aıasyn keńeıtý jáne ony memlekettik organdarda paıdalanýǵa qatysty ózderin tolǵandyrǵan suraqtarǵa jaýap aldy.

Depýtattar kezdesýden keıin joǵarǵy oqý ornynyń materıaldyq-tehnıkalyq bazasymen jáne stýdentterdi oqytý protsesimen tanysty.