Aldaǵy on jylda munaı baǵasy barreline $100 bolýy ekitalaı - sarapshy pikiri

ASTANA. QazAqparat - Aldaǵy on jylda munaı baǵasy barreline $100 bolýyn kútpeı-aq qoıýǵa bolady. Mundaı pikirdi búgin OKQ baspasóz máslıhatynda Eýrazııalyq ıntegraıtsıa ınstıtýty Ekonomıkalyq zertteýler bóliminiń meńgerýshisi Vladımır Telnov bildirdi.

«Aldaǵy 10 jylda munaı baǵasy barreline 60-80 dollar arasynda qubylyp turady. Óıtkeni álemde óndiriletin munaıdyń 4/3 bóligi onyń tasymaly shyǵyndaryna jumsalady. Aldaǵy ýaqytta tehnıkalyq progress bolady, sonyń nátıjesinde energııanyń balamaly kózderi tabylady. Máselen, avtokólikterdi alaıyq. Qazirgi kezde kún sáýlesimen júretin túrli elektrkólikter shyǵyp jatyr. Budan basqa da mysaldar qanshama. Árıne, munyń bári munaı baǵasyna áser etpeı qoımaıdy», - dep atap ótti V.Telnov.

Onyń aıtýynsha, óndirilgen munaıdyń ¼ bóligi munaı hımııasyna ketedi. Mine, barlyq maılar men basqa da ónimder osy bólikten jasalady.

«Sonymen qatar, munaı baǵasy túrli kezeńderge de baılanysty. Máselen, jeti jyldyq kezeńder bar, olar da negizinen álemdegi óndiristiń negizgi quraldarynyń jańarýyna jáne jańa tehnologııalarǵa baılanysty. Sondyqtan, munaı baǵasynyń barreline 100 dollar bolýyn aldaǵy 10 jylda kútpeýge de bolady», - deıdi maman.

Bul boljammen QR Tuńǵysh Prezıdenti - Ult kóshbasshysy kitaphanasynyń strategııalyq zertteýler jáne boljamdar qyzmetiniń meńgerýshisi Mıhaıl Mıronenko da kelisedi.

«Eger de dál qazirgi jaǵdaıdaǵy aqshanyń satyp alý qabiletine qaraıtyn bolsaq, onda shynymen de aldaǵy 10 jylda munaı baǵasynyń 100 dollarǵa jetýi ekitalaı. Qazirgi naryqtaǵy «Brend» markaly munaıdyń baǵasy barreline 62 dollardy qurap tur. Bul naryqta qalyptasqan tepe-teńdik baǵasy. Sondyqtan bıyl osy baǵa saqtalady da, 2016 jyly azdaǵan «tosynsyılar» bolýy múmkin», - deıdi Mıhaıl Mıronenko.