Aldaǵy on jylda da «QazMunaıGaz» kompanııasynyń jaǵdaıy ońtaıly bolady - KAZENERGY VII Eýrazııalyq forýmy
Al forýmǵa qatysyp jatqan sheteldik sarapshy-mamandar energetıka salasynyń damý bolashaǵyna kóz júgirtip, aldaǵy ýaqytqa negizdelgen josparlary men zerdelegen tujyrymdaryn ortaǵa salýda.
Forýmnyń ashylýyna qatysqan QR Premer-Mınıstri Serik Ahmetovtyń paıymdaýynsha, búginde KAZENERGY forýmy qazaqstandyq jáne álemdik energetıkanyń ózekti máseleleri talqylanatyn negizgi halyqaralyq alańǵa aınalyp keledi. Sebebi buǵan deıin ótken májilister osy is-sharanyń tıimdiligin kórsetti. Memleket pen bıznes arasyndaǵy baılanys kúsheıip, Qazaqstannyń munaı-gaz keshenin turaqty damytýǵa qajetti alǵysharttar jasalyp otyr.
Atap aıtqanda, Úkimet basshysy Indýstrııalyq-ınnovatsııalyq baǵdarlamaǵa sáıkes, Qazaqstannyń munaı-gaz zaýyttaryn jańǵyrtý jumysy 2015 jylǵa deıin kezeń-kezeńimen júrgiziletinin jarııa etti.
Máselen, Atyraý munaı óńdeý zaýytyn qaıta jańǵyrtý óz kezeginde joǵary sapaly benzındi óndirý kólemin úsh ese arttyrýǵa jol ashpaq. Belgili bolǵandaı, 2013 jyly Soltústik Kaspıı jobasyn iske qosý josparlanyp otyr.
«Búginde tabıǵı gazdy óndirý kólemi artyp jatyr. Osyǵan oraı Qarashyǵanaqta jylyna 5 mlrd. tekshemetr gazdy óńdeıtin zaýyt salynatyn bolady. Al Qazaqstannyń munaı-gaz zaýyttaryn jańǵyrtý jumysy 2015 jylǵa deıin kezeń-kezeńimen júrgiziledi», - deıdi S.Ahmetov.
Óz kezeginde «QazMunaıGaz» UK» AQ basqarma tóraǵasy Lázzat Qıynov Qazaqstannyń munaı óńdeý zaýyttary 2013-2015 jyldary jańǵyrtylatynyn tilge tıek etti. Munaı óńdeý zaýyttaryn jańǵyrtý jobalaryn júzege asyrý óz kezeginde munaıdy óńdeýdiń kólemi men tereńdigin arttyrýǵa, onyń ishinde ashyq tústi munaı ónimderi óndirisin joǵarylatýǵa, sondaı-aq benzın men dızel otyny sapasynyń artýyna múmkindik bermek. Belgili bolǵanyndaı, atalǵan jańǵyrtý jumystaryna 6 mlrd. teńge kóleminde ınvestıtsııa baǵyttalmaq.
Sonymen qatar «QazMunaıGaz» ulttyq kompanııasynyń josparlarynyń biri aýqymdy ınvestıtsııany ulttyq gaz tasymaldaý ınfraqurylymyn keńeıtýge baǵyttaýǵa negizdelgen eken. Bul turǵyda kompanııasynyń basshysy 1,4 myń shaqyrymǵa sozylatyn «Beıneý-Bozoı-Shymkent» gaz qubyry qurylysynyń jobasyn eskerip ótti. Bul jobany júzege asyrý arqyly ishki naryqtaǵy qajettilikti qamtamasyz etýge, ekonomıkanyń energetıkalyq qaýipsizdigin arttyrýǵa, elimizdiń batys óńirinen tabıǵı gazdy jetkizýde jańa eksporttyq baǵdardy qurýǵa múmkindik beretinin eske saldy.
QMG qordyń negizgi ósimi men kómirsýtekterdi óndirýdi Kaspıı qaırańyn ıgerýmen baılanystyryp otyr. «Resýrstyq bazany arttyrýdaǵy bizdiń maqsatqa qol jetkizý úshin kompanııa birqatar birlesken geologııalyq barlaý jobalaryn isker seriktestermen Kaspıı teńizinde júzege asyrýda», - dedi L. Qıynov. Osy oraıda ol 2014 jylǵa deıin «Jambyl» , «N», «Sátbaev», «Jeńis», «Abaı», «Isataı», «Shaǵala», «Darhan», «Hvalynskoe» jáne basqa da jobalardy ári qaraı iske asyrý jalǵasatynyn, sondaı-aq osynyń aıasynda 19-20 barlaý jáne baǵalaý uńǵymalaryn burǵylaý kózdelgenin atap ótti.
«Jalpy Kaspıı aýmaǵyndaǵy munaı jobalary esebinen munaı men gaz kondensatyn óndirý deńgeıi bıylǵy jylǵy kórsetkishke qaraǵanda 2022 jylǵa qaraı 1,6 esege artatyn bolady», - dep túıindedi L. Qıynov.
Qazaqstan kómirsýtekterdiń qory boıynsha álem elderiniń alǵashqy ondyǵyna enip otyr jáne TMD memleketteriniń arasynda Reseıden keıin ekinshi orynda eken. Elimizdiń munaı boıynsha dáleldengen qory 39,8 mlrd. barrel, al gaz kólemi turǵysynda 3 trln. tekshemetrden astam kórinedi. Munaı óndirý kólemi boıynsha Qazaqstan 2011 jyly álemde 15-shi orynda tuǵyrlandy. 20 jyldyń ishinde munaı men gaz kondensatyn óndirý deńgeıi 3 esege artyp, ótken jyly 82 mln. tonnadan asyp túsken.
Bul turǵyda munaı-gaz salasyn damytýdyń strategııalyq maqsat mindetterin sheshý boıynsha basty ról «QazMunaıGaz» kompanııasyna júktelgen. Kompanııa kómirsýtekterdi barlaý men óndirýde, qaıta óńdeý jáne tasymaldaýda ulttyq operator, sondaı-aq Qazaqstannyń munaı-gaz salasynda memlekettiń múddesine qyzmet jasaıdy.
L. Qıynovtyń paıymdaýynsha, kompanııanyń keleshegi men maqsatty kórsetkishteri álemde munaı baǵasy aıtarlyqtaı quldyrap jatsa da, 2022 jylǵa qaraı da ońtaıly ahýalmen qalyptasady. Salanyń damýynyń strategııalyq maqsattaryna qol jetkizý úshin QMG «2012-2022 jyldarǵa arnalǵan uzaq merzimdi strategııany» ázirledi. Bul qujatqa sáıkes kompanııanyń maqsaty - álemniń eń iri 30 munaı-gaz kompanııalarynyń qataryna ený.
Aıtpaqshy, atalǵan forým aıasynda ótken baspasóz máslıhatynda KAZENERGY qaýymdastyǵynyń tóraǵasy Tımýr Qulybaev «Qashaǵan» ken ornynda munaı óndirý aldaǵy jyldyń naýryzynda bastalatynyn aıtty.
Sonymen qatar QR Munaı jáne gaz mınıstri Saýat Myńbaev taǵy bir jańalyqtyń betin ashty. Atap aıtqanda, Qarashyǵanaq jobasyn keńeıtý kózdelip otyr. Ol boıynsha Reseımen tıisti kelissózder júrgizilip jatyr. Óıtkeni shıki gazdyń basym bóligi Orynbor gaz óńdeý zaýytyna jetkiziledi. Al shıkizattyń qalǵan bóligin Qazaqstan jerinde salynatyn jańa zaýytta óńdeý kózdelip otyr.