Aldaǵy oqý jylyna muǵalimderdi qabyldaý jańa tártippen júrgiziledi

NUR-SULTAN. QazAqparat –Muǵalimderdi jumysqa qabyldaý jańa tártippen júrgiziledi. Bul týraly QR Oqý-aǵartý birinshi vıtse-mınıstri Sholpan Karınova aıtty, dep habarlaıdy QazAqparat tilshisi.

«Ótken jyly 19 qarashada Bilim jáne Eńbek mınıstrlikteriniń birlesken buıryǵy qabyldandy. Bıylǵy oqý jylyna muǵalimderdi qabyldaý osy jańartylǵan buıryqtyń negizinde júzege asyrylady. Pedagogtardy jumysqa qabyldaýdyń negizgi maqsaty - osy pedagogtardy jumysqa qabyldaý kezinde ashyqtyq pen ádildikti qamtamasyz etý, oqý júktemesin bólý barysynda zańsyzdyqtardy boldyrmaý jáne pedagogıkalyq bekitilgen júktemen qamtamasyz etý», - ol mınıstrliktiń apparat jınalysynda.

Onyń atap ótýinshe, bos jumys orny shyqqan kezde árbir jumys berýshi, ıaǵnı, mektep dırektory jumys ornynyń bosaǵanyn bes kúnniń ishinde eńbek jaǵdaılary men jalaqysyn kórsete otyryp, Halyqty jumyspen qamtý ornyna aqparat berýi tıis. Málimetter jazbasha nemese elektrondy eńbek bırjasy memlekettik aqparattyq portalynda beriledi.

«Bul rette Halyqty jumyspen qamtý týraly zańnamany buzǵany úshin jaýapkershiliktiń qarastyrylǵanyn esterińizge salǵym keledi. Sondyqtan bosaǵan barlyq orynǵa qatysty aqparatty mektep, basqa bilim mekemeleriniń basshylary ýaqytyly usynýy tıis», - dedi Sholpan Karınova.