Aldaǵy eki jylda múmkindigi shekteýli adamdar úshin 13 myńǵa jýyq nysan beıimdeledi

ASTANA. QazAqparat – Bıyl múmkindigi shekteýli adamdar úshin nysandardy yńǵaıly etip beıimdeý jumystaryna 1,7 mlrd teńge bólindi. Bul týraly Eńbek jáne áleýmettik qorǵaý komıtetiniń tóraǵasy Tólegen Ospanqulov aıtty, dep habarlaıdy QazAqparat tilshisi.

«Múgedektigi bar jandarǵa qoǵamda qalypty jaǵdaı jasaý maqsatynda 2025 jylǵa deıingi ulttyq jospar, «Amanat» partııasynyń jol kartasy jáne Memleket basshysynyń tapsyrmasy boıynsha 2021 jyly ázirlengen «Kedergisiz keleshek» jobasy iske asyrylýda. Osylardyń sheńberinde el boıynsha qaıta beıimdeýdi talap etetin 22 myń nysan anyqtaldy. 2021 jyldan bastap 2025 jylǵa deıin ár jyl saıyn 4 400 nysannan beıimdelip otyrady», - dedi Tólegen Ospanqulov Ortalyq kommýnıkatsııalar qyzmetinde ótken brıfıngide.

Onyń aıtýynsha, 2021 jyldan beri atqarylyp kele jatqan jumystardyń nátıjesinde búginge deıin 9 030 nysan múmkindigi shekteýli adamdar úshin qaıta beıimdelgen.

«Jergilikti atqarýshy organdardyń deregine saı, bıyl jergilikti bıýdjetten erekshe qajettilikteri bar adamdar úshin ınfraqurylymdy jaqsartýǵa, sonyń ishinde olardy pandýstarmen, beıimdelgen lıfttermen, dárethanalarmen, zaǵıptar úshin baǵyttaýshy belgilermen qamtamasyz etýge 1,7 mlrd teńge bólingen», - dep toqtaldy komıtet tóraǵasy.