Aldaǵy eki jylda aýdan jáne oblystyq mańyzy bar qala ákimderin saılaý ótedi - Prezıdent

ASTANA. QazAqparat – Aýyl ákimderiniń 64 paıyzy jergilikti jurttyń tikeleı saılaýymen qyzmetke keldi. Bul týraly eldiń áleýmettik-ekonomıkalyq máseleleri jónindegi keńeıtilgen keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Jergilikti depýtattar aımaqtaǵy tekserý komıssııalarymen tyǵyz qarym-qatynas ornatýy kerek. Bul komıssııalardyń róli edáýir artyp, jaýapkershiligi kúsheıtiledi. Aldaǵy eki jylda pılottyq joba retinde aýdan jáne oblystyq mańyzy bar qala ákimderin tikeleı saılaý ótedi. Osy oraıda qajetti normatıvtik bazany jáne jol kartasyn ázirleý qajet. Úkimet bul jumysty Ortalyq saılaý komıssııasymen jáne oblys ákimderimen birlesip júrgizedi. Biz qoǵamdy demokratııalandyrý jáne bılik quzyretterin tómenge berý úderisin jalǵastyramyz. «Jergilikti ózin-ózi basqarý týraly» zańnyń qabyldanýy bul baǵyttaǵy taǵy bir mańyzdy qadam bolmaq. Qazir tıisti zań jobasy Májiliste talqylanyp jatqanyn bilesizder», - dedi Qasym-Jomart Toqaev.

Prezıdent aýyl ákimderiniń basym bóligi saılanǵanyn aıtty.

«Aýyl ákimderi kún saıyn turǵyndardyń muń-muqtajyn tyńdap, máselelerin sheshedi. Sondyqtan olar elimizde aıryqsha ról atqarady. Aýyl ákimderiniń 64 paıyzy jergilikti jurttyń tikeleı saılaýymen qyzmetke keldi. Muny, shyn máninde, zor jetistik deýge bolady. Turǵyndardyń máselesin jedel ári tıimdi sheshý úshin olarǵa kóbirek múmkindik berilip jatyr. Bul jumys ta jalǵasyn tabady», - dedi Memleket basshysy.