Aldaǵy eki jylda 1300 aýyldyń ákimi saılanady

ASTANA. QazAqparat – Saıası júıeni reformalaý aıasynda ótken saılaý óz nátıjelerin kórsetýde. Bul pikirdi QR Prezıdenti Ákimshiligi basshysynyń orynbasary Aıda Balaeva aıtty, dep habarlaıdy QazAqparat tilshisi.

«2021 jyly elimizde aýyl ákimderin tikeleı saılaý ınstıtýty engizildi. 2021-2022 jyldary aýyldyq saılaýshylar 1,3 myńnan astam ákimdi saılaǵan edi. Al 2023-2024 jyldary taǵy osynsha aýyldyq okrýgte saılaý josparlanǵan. Nátıjesinde halyq saılaǵan ákimder táýelsizdik alyp qana qoımaı, saılaýshylar aldyndaǵy jaýapkershilik pen eseptilikti de arttyrady. Qazirdiń ózinde saılanǵan aýyl ákimderi jerlesteriniń tańdaýy durys bolǵanyn kórsetip, dáleldep jatyr», - dedi Aıda Balaeva Qazaqstan halqy Assambleıasynyń XXXII sessııasynyń jalpy otyrysynda.

Spıkerdiń aıtýynsha, jergilikti turǵyndar ózderi tańdaǵan ákimderdiń jumysyna rıza ekenin áleýmettik jelilerge jarııalap jatyr.

Maqtaýǵa ilingen ákimder qatarynda BQO Aqsýat aýyldyq okrýginiń ákimi, Aqmola oblysy Abaı aýylynyń ákimi, Qaraǵandy aýyldyq okrýginiń ákimi jáne basqalary bar.

«Saılanǵan aýyl ákimderiniń 52% astamy – jańa adamdar. Onyń kópshiligi memlekettik qyzmetshi emes. Olar saılaýǵa óz aýyldarynyń áleýmettik-ekonomıkalyq jaǵdaıyn jaqsartý boıynsha ózderiniń naqty baǵdarlamalarymen keldi jáne qazir bul baǵdarlamalar júzege asyrylyp jatyr», - dedi Aıda Balaeva.