Aldaǵy 7 jylda agroónerkásip keshenine 20 mlrd. dollar bólinedi - Q.Kósherbaev
Bul týraly búgin Astanada Halyqaralyq epızootııalyq bıýronyń (HEB) aımaqtyq semınarynda QR Premer-Mınıstriniń orynbasary Qyrymbek Kósherbaev málim etti.
«Prezıdent tapsyrmasymen Qazaqstanda agroónerkásiptik keshendi damytýdyń aýqymdy baǵdarlamasy júzege asyrylatyn bolady. Aldaǵy jeti jyl ishinde eldiń agroónerkásip keshenin ilgeriletýge 20 mıllıard AQSh dollarynan astam qarjy bólý josparlanǵan. Munda qarjylyq saýyqtyrý jáne agroónerkásiptik keshenge qajetti resýrstardyń qoljetimdiligimen qatar, fıtosanıtarııa men veterınarııa salalaryn memlekettik qoldaý sharalary jasalady», - dep atap ótti vıtse-premer.
Onyń aıtýynsha, osy turǵyda HEB-pen aradaǵy áriptestik Qazaqstan úshin asa mańyzdy basymdyqtardyń biri bolyp otyr.
«Bul Ortalyq Azııa aımaǵyndaǵy barlyq memleketter úshin jaqsy úlgi bolady. Atalmysh aýqymdy jobany iske asyrýda álemdik standarttarǵa saı bolý úshin Halyqaralyq epızootııalyq bıýronyń úlken qoldaýy qajet. Sondyqtan kórsetip otyrǵan qoldaýy úshin, áriptestigi úshin HEB basshylyǵyna alǵysymdy bildiremin. Bir-birimizge qoldaý kórsetý arqyly biz aldymyzda turǵan mindetterdi tıimdi sheshe alamyz», - dedi Q.Kósherbaev.
Aıta keteıik, HEB-tiń aımaqtyq otyrysy «Shyǵys Eýropa elderi kontekstinde veterınarııa salasyndaǵy qoǵamdyq birlestikter» taqyrybynda ótti. Oǵan aımaqtyq komıssııa men Eýropalyq Odaq sarapshylary, Dúnıejúzilik bank ókilderi, sonymen qatar 15 eldiń veterınarlyq qyzmetteriniń jáne basqa da halyqaralyq uıymdardyń mamandary qatysty. Semınar aıasynda veterınarlyq qyzmetterdiń zańnamalyq bazasyn jetildirý, maldardyń densaýlyǵyn qorǵaý jáne saýyqtyrý, HEB-pen aradaǵy ekijaqty kelisimderdiń negizinde jasalǵan baǵdarlamalardy iske asyrý máseleleri qarastyryldy.