Aldaǵy 5 jylda mashına jasaý salasynda qandaı mamandar suranysta bolady
«Mashına jasaý salasynda kásibı bilimi bar bilikti kadrlardyń jetispeýshiligi baıqalady. Ulttyq boljamǵa sáıkes, orta merzimdi kezeńde (2024-2028 jyldar aralyǵy) jalpy qajettilik 7 myń mamandy quraıdy. Aldaǵy 5 jylda eń kóp suranysqa ıe mamandyqtar: dánekerleýshi, ónerkásiptik jabdyqtardyń slesarlary, ınjener-mehanık, metall buıymdaryn óńdeý jónindegi operator, ónerkásiptik robototehnıkanyń ınjener-konstrýktory, vırtýaldy prototıpteý jónindegi maman, boljamdy dıagnostıka mamany», - dep tapshy mamandyqtardyń tizimi keltirilgen keshendi josparda.
Indýstrııa jáne ınfroqurylymdyq damý mınıstrliginiń aqparatyna qaraǵanda, atalǵan sala boıynsha kásibı kadrlardy daıarlaýǵa myna máseleler kedergi bolyp otyr:
- uzaq merzimdi kezeńge kadrlyq qajettilikke boljamdy zertteýler júrgizý úshin jetilmegen ádistemelik baza;
- jumys berýshilerdi kadrlardy daıarlaýǵa jáne qaıta daıarlaýǵa tartý jónindegi zańnamalyq bazanyń jetkiliksizdigi;
- tehnıkalyq jáne kásiptik bilim beretin oqý oryndarynyń (TjKB) eskirgen materıaldyq-tehnıkalyq bazasy;
- dýaldy bilim berý, TjKB túlekterin sertıfıkattaý júıesi keńinen qoldanylmaıdy;
- joǵary jáne joǵary oqý ornynan keıingi bilim berý baǵdarlamalarynyń mazmuny eńbek naryǵyndaǵy ózgeristerdi bildiretin jumys berýshilerdiń talaptaryna tolyq sáıkes kelmeıdi;
- áleýmettik áriptestik jetkiliksiz damyǵan. Óndiristik praktıka bazalarymen qamtamasyz etý, túlekterdi jumysqa ornalastyrý, jumys berýshilerdi kásibı standarttardy qurý protsesine tartý tetikteri joq.
«Salany damytýǵa kedergi keltiretin máselelerdi keshendi sheshý mańyzdy. Óıtkeni, olar tehnologııalyq, tehnıkalyq, zańnamalyq, normatıvtik-quqyqtyq, qarjy-ekonomıkalyq, bilim berý, kadrlyq jáne ózge de salalardaǵy máselelerdiń keń aýqymyn qozǵaıdy», - dep túsinikteme berilgen qujatqa.
Buǵan deıin habarlaǵanymyzdaı, Qazaqstandaǵy mashına jasaý salasyn damytýdyń 2024-2028 jyldarǵa arnalǵan keshendi jospary bekitilmek.