Aldaǵy 3 jylda elimizde 87 jemis saqtaý qoımasy salynady

NUR-SULTAN. QazAqparat - QR Aýyl sharýashylyǵy mınıstri Erbol Qarashókeev iri jáne orta aýyl sharýashylyǵy taýarlaryn óndirýshilerdiń óz ónimderin saqtaý múmkindigi bolýy tıistigin aıtty, dep habarlaıdy «QazAqparat» HAA tilshisi.

Elordada aýyl sharýashylyǵy taýarlaryn óndirýshilerimen kezdesý barysynda mınıstr Kókónis saqtaý jol kartasyna sáıkes, aýyl sharýashylyǵy taýarlaryn óndirýshiler sýbsıdııa arqyly qoımalar salýǵa múmkindigi bar ekendigin atap ótti. Bul rette memleket qurylysqa ketken qarajattyń 40-50 paıyzyn ótep beredi. Mınıstrlik aldaǵy 3 jylda 87 jemis saqtaý qoımasyn salýdy josparlap otyr. Qoımalardyń jalpy saqtaý kólemi 350 myń tonnaǵa jýyqtaıdy.

«Biz iri jáne orta aýyl sharýashylyǵy taýarlaryn óndirýshiler óz ónimderin saqtaı alýy tıis dep esepteımiz. Shaǵyn jáne orta aýyl sharýashylyǵy taýar óndirýshileriniń kópshiliginde ónim egistikten alynady jáne ol maýsymnan tys ýaqytqa jetpeıdi. Bizdiń aýyl sharýashylyǵy taýaryn óndirýshilerimiz az paıda tabady», - dedi Erbol Qarashókeev.

Onyń aıtýynsha, Aýyl sharýashylyǵy mınıstrligi aýyl sharýashylyǵy ónimderin mamyr-maýsymǵa deıin saqtaý mindettemesin alyp otyr. Sondaı-aq, kórshiles Qyrǵyzstan men Ózbekstannan erte pisetin kókónisterdi tómen baǵamen jetkizý týraly kelisý josparlanǵan. Qazir Qazaqstanda maýsymaralyq kezeńde saqtaý sapasyna baılanysty kúzgi kókónister jetispeıdi, al erte túsetin kókónister áli joq. Sondyqtan jyl saıyn baǵanyń ósýi baıqalady.

«Bul jerde másele, árıne, ońaı emes. Biraq ony kókónisterdi saqtaý arqyly sheshý kerek», - dedi mınıstr.