Aldaǵy 2 jylda óńirlerge salyqtan túsetin qarajat kóbirek beriledi

ASTANA. QazAqparat –2025 jyldyń sońyna deıin óńirlerge beriletin qosymsha salyqtar men tólemderdiń kólemi 2 ese ulǵaıady. Mundaı derekter Ashyq NQA portalynda jarııalanǵan «Qazaqstanda jergilikti ózin-ózi basqarýdy damytýdyń 2025 jylǵa deıingi tujyrymdamasynda» keltirilgen, dep habarlaıdy QazAqparat tilshisi.

Qujatta kórsetilgendeı, Jergilikti ózin ózin basqarýdy damytý tujyrymdamasyn oryndaý aıasynda myna jumystar qolǵa alynady:

- máslıhattyń tekserý komıssııalary múshelerin tóraǵanyń usynýy men Joǵary aýdıtorlyq palatanyń kelisimi arqyly taǵaıyndaýdy engizý;

- barlyq deńgeıdegi máslıhattar jumysynyń tıimdiligin arttyrý;

- ákimshilik-aýmaqtyq qurylysty jetildirý;

- 2024 jyldyń qańtar-jeltoqsan aralyǵynda ákim apparattaryn jergilikti ózin-ózi basqarý ákimshiligi etip qaıta qurýǵa baǵyttalǵan pılottyq jobany iske asyrý;

- Qalalarda jergilikti ózin-ózi basqarýdy damytý;

- Azamattardy jergilikti ózin-ózi basqarý isine tartý.

Osy jumystardy júıeli jolǵa qoıý esebinen myna nátıjelerge qol jetkizý josparlanyp otyr:

- 2024 jylǵa deıin Qazaqstandaǵy aýdandar men oblystyq mańyzy bar qala ákimderiniń 25%-yn tikeleı saılaý;

- 2025 jyldyń sońyna qaraı bıýdjettiń IV deńgeıindegi ótkizilmegen memlekettik satyp alýlar kólemin 2023 jylmen salystyrǵanda 3 esege azaıtý;

- 2025 jyldyń qorytyndysy boıynsha bıýdjettiń IV deńgeıindegi salyqtyq jáne salyqtyq emes túsimderdi (qosymsha salyqtar men tólemderdi berý esebinen) 2021 jylmen salystyrǵanda 2 ese arttyrý.

«Joǵaryda kórsetilgen sharalardy iske asyrý jergilikti ózin-ózi basqarý organdarynyń qyzmetin kúsheıtýge, aýyldyq okrýgter ákimderiniń ókilettikterin keńeıtýge, ákimderdi saılaý protsesin jetildirýge múmkindik beredi», - dep Ulttyq ekonomıka mınıstrligi tujyrymdamaǵa túsindirme bergen.

Qujat 26 qyrkúıekke deıin kópshilik talqylaýda bolady.

Eske salaıyq, osy aıdyń basynda Qazaqstan halqyna Joldaýyn jarııalaǵan Prezıdent Qasym-Jomart Toqaev aýdandar men oblystyq mańyzy bar qala ákimderin saılaý mehanızmin ózgertý bastamasyn kótergen bolatyn.

«Aımaqtaǵy atqarýshy bıliktiń sheshim qabyldaý isine azamattardyń tikeleı qatysý múmkindigin birtindep arttyrý da mańyzdy. Aýyl, kent jáne aýyldyq okrýg ákimderin turǵyndar ózderi saılaı bastaǵanyna eki jyldan asty. Sodan beri aýyldyq deńgeıdegi ákimderdiń tórtten úshi saılandy. Endi aýdan jáne oblystyq deńgeıdegi qala ákimderin saılap kóremiz», - dedi Prezıdent.