Aldaǵy 3 jylda sport mektepteri jańartylady – Almaty ákimi

<p>ALMATY. KAZINFORM &ndash; Almaty qalasynyń ákimi Erbolat Dosaev Almaly aýdanynyń turǵyndarymen kezdesti. Shahar basshysy aýdandaǵy joba-josparlar týraly baıandama jasap, odan keıin turǵyndardyń suraqtaryna jaýap berdi.</p>

Óz kezeginde aýdan turǵyny sport mektepterin jańǵyrtý máselesin qozǵady.

– Sporttaǵy daryndy balalarǵa arnalǵan mamandandyrylǵan mektep-ınternat-kolledjiniń ata-analarynyń atynan kelip turmyn. Sportta jetistikke jetý úshin oǵan jaǵdaı jasaý kerek ekeni eshkimge jasyryn emes. Biz mektep-ınternatyna rekonstrýktsııa jasaýdy ótinemiz. Óıtkeni mektep kishkentaı, oryn tapshy, - dedi turǵyn.

Almaty qalasynyń ákimi 2025-2027 jyldary sport mektepteri modernızatsııalanatynyn atap ótti.

– Almatyda sońǵy 2 jylda bul máselege erekshe kóńil bóle bastadyq. Bolashaq chempıondarymyz úshin jaqsy jaǵdaı jasalǵanyn qalaımyz. Bizdiń daryndy balalarǵa sport mektepterine bir kezderi tıisti nazar aýdarylmaǵan. Aldaǵy 3 jylda 2025-2027 jyldary biz sizdiń mektepti ǵana emes, barlyq sport mektebin jańartamyz. Ótken jyldan bastap biz qarjylandyrýdy kóbeıttik. Chempıondar bir sátte paıda bolmaıdy, barlyǵy mektepten bastalady. Sondyqtan bul biz úshin mańyzdy baǵyttardyń biri, - dedi Erbolat Dosaev. 

Eske salsaq, buǵan deıin Jambyl oblysynda 100-ge jýyq mektep jóndeýden ótkenin jazǵan edik.